Беларуска аформіла на сябе крэдыт для сяброўкі, а тая адмовілася даваць грошы. Што адказалі ў судзе?
Жыхарка Жыткавіцкага раёна звярнулася ў суд з незвычайнай праблемай. Сяброўка, для якой яна аформіла крэдыт, адмовілася плаціць па ім рахункі. Пра здарэнне распавялі ў прэс-службе Генеральнай пракуратуры.
У 2021 годзе беларуска працавала агароднікам і жыла ў інтэрнаце ў аграгарадку Урыцкае. У інтэрнаце яна пазнаёмілася з жанчынай і пачала дапамагаць ёй з доглядам за двума маленькімі дзецьмі.
У лістападзе таго ж года новая сяброўка звярнулася да яе з просьбай узяць для яе крэдыт у банку. Сама жанчына гэтага зрабіць не магла, бо мела на сваім рахунку ўжо два іншых крэдыты.
Агародніца ўзяла крэдыт на 7 год памерам 3700 рублёў і перадала грошы знаёмай. Па вуснай дамоўленасці тая павінна была самастойна штомесяц уносіць грошы на крэдытны рахунак.
У жніўні 2022 года высветлілася, што сяброўка не плаціла абавязковыя сумы за крэдыт. Агародніцы прыйшло паведамленне ад банка аб тым, што аплаты пратэрмінаваны.
Суседка адмовілася плаціць грошы за крэдыт, які прасіла аформіць для сябе. Тады агародніца самастойна ўнесла грошы ў банк: асноўны доўг, працэнты і няўстойку. Агулам — каля 4,7 тысяч рублёў.
На той час пацярпелая ўжо была цяжарнай і не мела мужа. У цяжкай сітуацыі яна звярнулася да пракуратуры, дзе супраць яе былой сяброўкі ўзбудзілі справу аб незаконным узбагачэнні і працэнтах за карыстанне чужымі грашыма.
Суд Савецкага раёна Гомеля гэты іск задаволіў. Акрамя асноўнай сумы, з былой сяброўкі ўзялі дзяржаўную пошліну ў памеры 230 рублёў.
Цяпер чытаюць
«У майго 21 сантыметр — дзесяць базавых далі». Беларусы ў тыктоку жартуюць з новых правілаў ад чыноўнікаў7
Каментары