Маладая доктарка з Мінска расказала пра боль усіх участковых тэрапеўтаў
Дзяўчына, якая цяпер працуе ўчастковай тэрапеўткай у сталіцы, растлумачыла ў тыктоку, чаму часта адчувае сябе прыніжанай. А яшчэ — чаму ніколі больш не будзе тэлефанаваць пацыентам перад візітам.
Доктарку завуць Юлія. Яна запісала відэа, у якім бачна, што маладая доктарка не заспела дома пацыента, які выклікаў тэрапеўта. Юліі прыйшлося пакінуць проста ў дзвярах запіску з паведамленнем, што доктар усё ж прыходзіў — каб потым пацыент не абураўся.
Дзяўчына напісала, што такія сітуацыі — галаўны боль усіх участковых дактароў.
— Вось такім глупствам я займаюся ўвесь час. Вы выклікаеце доктара? Можаце хаця б дома быць, дзверы адчыняць? Ці не выклікайце тады.
Ролік завірусіўся і набраў больш за 285 тысяч праглядаў. Каментароў таксама шмат. Нехта прапаноўваў у такіх выпадках штрафаваць пацыента — бо калі змог кудысьці пайсці з кватэры, дык і да паліклінікі змог бы.
«Паходы дактароў па дамах — самая спажывецкая і бессэнсоўная рэч. Доктар нашмат карыснейшы ў сваім кабінеце. А калі не можаш дайсці да паліклінікі — хуткая на сувязі», — напісаў адзін з каментатараў.
Дактары (былыя і дзеючыя) падтрымалі дзяўчыну і падзяліліся ўласным досведам: «А потым яшчэ тэлефануюць у рэгістратуру: «Ой, а мы спалі і не чулі». І ты зноў ідзеш па тым жа самым адрасе», «І гэтыя паперкі фатаграфаваць трэба. Ды так, каб нумар кватэры з гэтымі дзвярыма трапіў у кадр. Прыбіраюць запіскі і пішуць скаргі, што не прыходзіў доктар на выклік».
Яшчэ адна тэрапеўтка прызналася, што з жахам згадвае першы год працы — калі зімой у холад прыходзіш да чалавека, які «памірае», а ў таго танчыкі на камп’ютары на паўзе.
Але былі і тыя, хто выказваў незадаволенасць тэрапеўтамі на выкліках. Каб адказаць ім, Юлія запісала новы ролік.
— Пасыл мінулага відэа быў такі: калі вы выклікаеце доктара, забяспечвайце, калі ласка, яго ўваход — у пад'езд, у кватэру. Каб доктар не адчуваў сябе няёмка — прыходзіцца тэлефанаваць у кучу кватэр, каб проста абслужыць вас дома.
Юлія таксама падкрэсліла, што тое відэа зняла ў першую чаргу для таго, каб засцерагчы сябе — і ў выпадку праблем даказаць, што яна сапраўды прыходзіла па тым адрасе.
Яна паскардзілася на тое, што стамілася ад выпадкаў, калі не працуе ці дамафон у доме, ці званок у кватэру. Юлія кажа, што добра, што ў Беларусі бясплатная медыцына і створаны зручныя ўмовы для пацыентаў, — але гэта прывяло да таго, што людзі страцілі павагу да медыкаў.
— Не буду казаць пра тое, што вельмі шмат выклікаў без нагоды, што вельмі шмат падману з боку людзей. Бывае, што выклікаюць па тэмпературы, а потым кажуць: «Насамрэч тэмпературы не было, проста не хацелася ісці ў паліклініку».
Адказала тэрапеўтка і тым каментатарам, хто раіў ёй тэлефанаваць пацыентам перад тым, як ісці да іх.
— Па-першае, гэта мой асабісты нумар. Калі я з яго патэлефаную, то ён застанецца ў пацыента. Я не хачу, каб пацыент ведаў мой нумар і званіў у непрацоўны час і нешта пытаў — такое ўжо было, і нават ноччу. Калі ласка, задавайце ўсе пытанні на прыёме. Па-другое, я не павінна траціць свае грошы на тое, каб датэлефанавацца вам, каб вы адчынілі мне дзверы.
Юлія прызналася, што раней тэлефанавала пацыентам, але больш не будзе гэтага рабіць. Кажа, што адчувала сябе зняважанай, калі прыходзілася тэлефанаваць і прасіць пусціць у дом.
«У мяне прыём каштуе 120 рублёў, чаму я павінна працаваць за 44, бл**ь, рублі?!» Дактары абмяркоўваюць рэгуляванне цэн
«Набяруць больш студэнтаў, але што рабіць 6-7 гадоў?» Медык пра тое, як улады змагаюцца з недахопам дактароў і што трэба рабіць
Хуткая музычная дапамога: доктар граў пацыентцы на фартэпіяна, чакаючы, пакуль лекі падзейнічаюць
Галоўная доктарка мінскай бальніцы растлумачыла, чаму невялікія заробкі ў медыкаў — гэта добра
Каментары