Адбываць пакараньне ён будзе ў вёсцы Сітнікі
Сёньня, 4 верасьня, адміністрацыя баранавіцкай спэцкамэндатуры паведаміла Міколу Статкевічу, што яго пад аховай павязуць адбываць пакараньне ў іншае месца, у Пухавіцкі раён. Кіраўнік баранавіцкай спэцкамэндатуры паведаміў Міколу Статкевічу, што перавод робіцца згодна з распараджэньнем мясцовага пракурора.
Пакараньне ён будзе адбываць у спэцкамэндатуры ў вёсцы Сітнікі, што месьціцца на рацэ Сьвіслач, на аўтатрасе Мар'іна Горка - Менск, за некалькі кілямэтраў ад Мар'інай Горкі.
Паводле кіраўніка "хіміі", пракурор спаслаўся на тое, што Мікола Статкевіч адбывае пакараньне ў парушэньне заканадаўчых нормаў: маўляў, паколькі палітык прапісаны ў Менску, ён павінен адбываць пакараньне ў Менскай вобласьці.
Нагадаем, што палітык больш за год правёў на хіміі ў Баранавічах за арганізацыю вулічных дэманстрацый пратэсту супраць фальсыфікацыі вынікаў выбараў і рэфэрэндуму-2004.
За арганізацыю вулічных акцый пакараныя таксама Павал Севярынец, які прапісаны ў Віцебску і пакараньне адбывае ў Віцебскай вобласьці, а таксама мянчук Андрэй Клімаў, якога зь Менскай вобласьці перавялі на Гомельшчыну.
Мікола Статкевіч лічыць, што перавод можа адкласьці на далёкую пэрспэктыву ўмоўна-датэрміновае вызваленьне. Палітык непакоіцца, што супраць яго могуць быць ужытыя правакацыі, каб яго рэальна пазбавіць волі.
Фота Андрэя Лянкевіча, НН
Цікава, што зь 1 верасьня ў Пухавіцкім раёне зарэгістраваны афіцыйны юрадрас Беларускай сацыял-дэмакратычнай партыі (Грамада) - апанэнтаў БСДП (Народная Грамада), якой кіруе Мікола Статкевіч.
Цяпер чытаюць
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін2
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»1414
Каментары