Макрон: Зяленскі быў дэмакратычна абраны, у адрозненне ад Пуціна, які забівае сваіх апанентаў і маніпулюе выбарамі

Прэзідэнт Францыі Эмануэль Макрон заявіў, што ўкраінскі лідар Уладзімір Зяленскі быў дэмакратычна абраны, у адрозненне ад Уладзіміра Пуціна, які «забівае сваіх апанентаў і маніпулюе выбарамі». Такім чынам ён адрэагаваў на словы Дональда Трампа, які напярэдадні назваў Зяленскага «дыктатарам без выбараў», піша Бі-бі-сі.

«Ён прэзідэнт, абраны ў свабоднай сістэме. Гэтага нельга сказаць пра Уладзіміра Пуціна, які ўжо даўно забівае сваіх апанентаў і маніпулюе выбарамі», — адзначыў Макрон, адказваючы на пытанні карыстальнікаў інтэрнэту.

Макрон таксама паведаміў, што ў найбліжэйшы час наведае Вашынгтон, каб паспрабаваць пераканаць Трампа, што інтарэсы ЗША супадаюць з інтарэсамі еўрапейскіх саюзнікаў. Паводле яго слоў, праяўленне слабасці перад Пуціным можа ўскладніць адносіны з Кітаем і Іранам.

Макрон заявіў, што нявызначанасць у дзеяннях Трампа адносна трохгадовага ўварвання Расіі ва Украіну выклікае занепакоенасць, але адначасова стварае няпэўнасць і для Пуціна, што можна выкарыстаць для спрыяння перамовам.

Французскі лідар адказваў на пытанні карыстальнікаў сацыяльных сетак у рамках ініцыятывы французскага ўрада па павышэнні абазнанасці людзей аб уздзеянні вайны ва Украіне, ролі Францыі і зменах у палітыцы ЗША пасля ўступлення Трампа на пасаду.

Між тым прэс-сакратарка Белага дома Кэралін Левіт у чацвер пацвердзіла, што ў панядзелак Трамп правядзе сустрэчу з Макронам, а ў чацвер сустрэнецца з прэм’ер-міністрам Вялікабрытаніі Кірам Стармерам.

Таксама Макрон заявіў, што не прымаў рашэння аб накіраванні войскаў ва Украіну «заўтра», а толькі ў выпадку спынення агню.

«Я не прымаў рашэння накіроўваць войскі ва Украіну ўжо заўтра — не. Тое, што мы разглядаем, — гэта адпраўка сіл для гарантавання міру, як толькі будзе дасягнута адпаведнае пагадненне», — сказаў ён.

Ананімная крыніца французскага агенцтва AFP у чацвер часткова пацвердзіла паведамленні брытанскай прэсы аб тым, што Вялікабрытанія і Францыя рыхтуюць план па размяшчэнні адносна невялікага сухапутнага кантынгенту ў тыле Украіны пры магутнай падтрымцы авіяцыі.

«Мы гаворым пра разгортванне, якое адбудзецца пасля спынення агню, — сказаў суразмоўца агенцтва. — Ідэя заключаецца ў тым, каб размясціць салдат на другой лініі, а не на фронце насупраць расійскіх войскаў. Гэта будзе спалучацца з шматнацыянальнай аперацыяй, у якой прымуць удзел не толькі еўрапейскія кантынгенты, але і сілы з іншых рэгіёнаў, якія будуць знаходзіцца на перадавой».

Паводле крыніцы, акрамя Вялікабрытаніі і Францыі, у гэтай аперацыі могуць удзельнічаць войскі з Даніі і краін Балтыі.

• 13
• 0
• 0
• 0
• 0
• 0
• 0
• 1