Шрайбман назваў тры прычыны, якія перашкаджаюць Лукашэнку выпусціць палітвязняў
«Калі б ён моцна хацеў гэта зрабіць, яму варта было б адпусціць Ціханоўскага і Калеснікаву. Ты іх выпускаеш у Вільню — і ў цябе праз месяц няма штаба Ціханоўскай як адзінага цэнтра сілы. Але гэта не мэта».
У новым выпуску ютуб-канала «ЧестнОК-LIVE» Аляксандр Івулін спытаў у палітычнага аналітыка Арцёма Шрайбмана, што перашкаджае Лукашэнку выпусціць усіх палітвязняў з умовай іх выезду за мяжу. Такі крок, на погляд журналіста, «выбіў бы галоўны козыр з рук апазіцыі».
Адказваючы на пытанне, Шрайбман адзначыў, што Лукашэнка не лічыць праблему дэмакратычных сілаў такой важнай, каб такім шляхам яе абяззброіць.
«Калі б ён моцна хацеў гэта зрабіць, яму варта было б адпусціць Ціханоўскага і Калеснікаву. Ты іх выпускаеш у Вільню — і ў цябе праз месяц няма штаба Ціханаўскай як адзінага цэнтра сілы. Калі б гэта была мэта. Але гэта не мэта».
На думку аналітыка, пакідаючы палітзняволеных, Лукашэнка імкнецца дасягнуць трох мэт.
«Па-першае, ён лічыць, што не ўсе вывучылі ўрок. Трэба разумець, што няма такога, што ты пабузіў, паставіў пад рызыку стабільнасць дзяржавы, а потым цябе проста праз нейкую колькасць гадоў выпусцілі і ты герой. Вось такога ён дапусціць не жадае.
Другое, гэта помслівасць. Я не схільны тут змяншаць абсалютна банальную чалавечую помслівасць. Ён лічыць, што яны здзейснілі ледзь не вышэйшае з магчымых злачынстваў, таму ў іх тэрміны, як у забойцаў, тэрарыстаў і гэтак далей.
І трэцяя прычына, якая ўжо больш нас вяртае ў сферу палітычнага аналізу, заключаецца ў тым, што, як добры гандляр, ён разумее, што прама зараз ён за іх не атрымае таго, чаго можа атрымаць».
Як вопытны гулец, Лукашэнка, па словах Шрайбмана, прытрымлівае козыр палітзняволеных да таго моманту, калі зможа іх «прадаць па максімальна дарагім кошце», калі шмат якія праблемы, кшталту незадаволенасці выбарамі, стануць неактуальнымі, забудуцца ў тым ліку і краінамі Захаду. У выніку застанецца толькі праблема палітвязняў.
«Пакуль усе фактары не сыдуцца разам, пакуль, па-першае, не суцішыцца прага помсты, а з іншага боку не будзе адчування, што гэты козыр прадаецца не проста так, я думаю, што (Лукашэнка — НН) будзе трымаць нейкую частку палітвязняў».
Да таго ж Шрайбман сумняваецца, што калі б палітвязняў выпусцілі проста цяпер, гэта сапраўды прывяло б да адмены санкцый.
«Засяроджуся на працы з ЗША». Ціханоўскі расказаў пра свае палітычныя планы на 2026 год32
Каментары