Гламурны космас. Джэф Безас адпраўляе сёння ў космас сваю нявесту і яшчэ пяць жанчын
Сёння днём ракета New Shepard кампаніі Blue Origin, якая належыць заснавальніку гандлёвага гіганта Amazon Джэфу Безасу, выведзе ў космас жаночы экіпаж з шасці чалавек — першы чыста жаночы з часоў палёту Валянціны Церашковай у 1963 годзе, піша Бі-бі-сі.
Безас адпраўляе ў космас сваю нявесту Лорэн Санчэс і яшчэ пяць жанчын: вядучую CBS Гейл Кінг, былую ракетчыцу NASA Аішу Боў, актывістку руху за грамадзянскія правы Аманду Нгуен, кінарэжысёрку Кэрыян Флін і поп-спявачку Кэці Перы.
Ракета New Shepard павінна стартаваць з Тэхаса каля 8:30 раніцы (15:30 па Мінску) і дасягнуць так званай «лініі Кармана» — прызнанай мяжы космасу, якая знаходзіцца на вышыні каля 100 км над паверхняй Зямлі. Поўнасцю аўтаматызаваны карабель будзе падымацца вертыкальна, пасля чаго капсула з экіпажам аддзяліцца і апусціцца на зямлю з дапамогай парашутаў і ракетнага запавольвальніка.
Палёт працягнецца каля 11 хвілін, і цягам кароткага часу жанчыны змогуць адшпіліць рамяні і парыць у стане няважкасці.
Місія NS-31 стане 11-м палётам чалавека ў космас для ракеты New Shepard кампаніі Blue Origin і 31-м у яе гісторыі. На дадзены момант у рамках праграмы ў космас адправіліся 52 чалавекі. Колькі каштуе адно месца на New Shepard, кампанія не раскрывае.
Перад стартам жанчыны, апранутыя ў чорнае, сфатаграфаваліся для часопіса Elle, які не без іроніі паведаміў, што гэта першы раз, калі людзі адпраўляюцца ў космас з макіяжам. «Космас нарэшце стане гламурным», — дадала Санчэс.
Апошні чыста жаночы палёт у космас адбыўся больш за 60 гадоў таму, калі савецкі касманаўт Валянціна Церашкова стала першай жанчынай, што здзейсніла адзіночны палёт у космас на караблі «Усход-6». Не выключана, што новы жаночы палёт у космас мае яшчэ адну мэту — падтрымаць грамадскую цікавасць да Blue Origin, паколькі канкурэнтная барацьба ў сферы касмічнага турызму набірае абароты.
Галоўны канкурэнт Безаса тут — кампанія Virgin Galactic, якая прапануе аналагічныя субарбітальныя палёты.
У студзені больш магутная ракета Blue Origin пад назвай New Glenn паспяхова здзейсніла свой першы беспілотны арбітальны палёт.
У будучыні Blue Origin збіраецца дастаўляць касмічных турыстаў на арбіту, наўпрост канкурыруючы са SpaceX Ілана Маска. Увогуле ж, па ацэнках экспертаў, менавіта паміж Маскам і Безасам разгорнецца асноўная барацьба за камерцыйныя касмічныя запускі. Пакуль SpaceX значна апярэджвае канкурэнта: ракеты сямейства Falcon 9 стартавалі ўжо 469 разоў. У адрозненне ад іх, Blue Origin ажыццявіла ўсяго 31 паспяховы запуск свайго карабля New Shepard.
Раней у гэтым годзе Blue Origin запусціла сваю больш буйную шматразовую ракету New Glenn (названую ў гонар Джона Глена, першага амерыканца, які пабываў на арбіце Зямлі) з мыса Канаверал у Фларыдзе. Кампанія сцвярджае, што яна працуе як «камерцыйны авіялайнер (але на больш чыстым паліве)» і зможа дастаўляць 13 тон карыснай нагрузкі на геастацыянарную арбіту і 45 тон — на нізкую арбіту.
Цяпер чытаюць
Высветлілі, дзе адбываўся «допыт» каліноўца Васіля Грачыхі12
Каментары