У Швецыі анлайн-сэкс прыраўнялі да прастытуцыі: карыстальнікам OnlyFans пагражае турма

Парламент Швецыі прыняў новы закон, які прыраўноўвае куплю сэкс-шоу ў інтэрнэце да аплаты сэксу з прастытуткай.

Па новых правілах забараняецца аплачваць сэксуальныя дзеянні, якія выконваюцца па індывідуальным запыце — напрыклад, у фармаце «пакажы гэта, зрабі тое». Ключавое адрозненне — «персаналізацыя» кантэнту. 

Прагляд і аплата папярэдне запісанага кантэнту для дарослых застануцца законнымі.

Таксама пад забарону трапляе не толькі купля анлайн-сэксу, але і садзейнічанне: дапамога ў прасоўванні, арганізацыя падобных паслуг і нават арэнда жылля для гэтага можа расцэньвацца як саўдзел.

Асабліва трывожыць сэкс-работнікаў палажэнне пра «трэція бакі»: цяпер, напрыклад, партнёр мадэлі можа быць абвінавачаны ў сутэнёрстве, калі яна працуе з іх супольнага дому.

Швецыя з 1999 года прытрымліваецца так званай «паўночнай мадэлі» (Nordic Model): купля сэксу караецца турэмным зняволеннем тэрмінам да аднаго года, а продаж — не. Такі падыход заснаваны на ідэі, што прадаўцы сэксуальных паслуг (у асноўным жанчыны) нярэдка аказваюцца ва ўразлівым становішчы, тады як купцы (у асноўным мужчыны) — галоўныя вінаватыя ў эксплуатацыі. Турэмным зняволеннем тэрмінам да 4 гадоў па шведскіх законах караецца і сутэнёр.

Але з развіццём інтэрнэту межы паміж афлайнам і анлайнам сцерліся. Многія спажыўцы зараз аддаюць перавагу інтымнаму ўзаемадзеянню ў лічбавым фармаце, што прывяло да неабходнасці «лічбавай мадэрнізацыі» закона.

«Гэта новая форма куплі сэксу, і нам трэба, каб законы ішлі ў нагу з тэхналагічным прагрэсам», — цытуюць СМІ заяву дэпутата ад Сацыял-дэмакратычнай партыі Тэрэзы Карвалья (Teresa Carvalho).

Прыхільнікі закону сцвярджаюць: калі сэксуальнае дзеянне забаронена ў рэальнасці, то яно павінна быць забаронена і ў інтэрнэце. На іх думку, анлайн-кантэнт можа стаць дарогай да больш небяспечных формаў эксплуатацыі і нават да гандлю людзьмі.

Некаторыя шведскія палітыкі лічаць, што закон — толькі пачатак. Асобныя дэпутаты заклікаюць да поўнай забароны платформаў тыпу OnlyFans і ўвядзення ўзроставых абмежаванняў на порнасайтах, каб абараніць дзяцей ад шкодных матэрыялаў.

Як піша шведскае выданне The Local, былы паліцыянт, а цяпер дэпутат-ліберал Марцін Мелін (Martin Melin) адзначыў у парламенце, што сачыць за выкананнем новага закона будзе складана:

«Я пакуль не разумею, як паліцыя зможа гэта даказваць. Але няхай гэта будзе галаўным болем пракуратуры».

Закон атрымаў шырокую падтрымку парламентарыяў і набывае моц 1 ліпеня 2025 года. Цяпер аплата індывідуальных сэксуальных паслуг у інтэрнэце — напрыклад, жывых трансляцый з выкананнем канкрэтных дзеянняў па замове — будзе разглядацца як набыццё сэксуальных паслуг і карацца пазбаўленнем волі тэрмінам да аднаго года. Таксама пад адказнасць трапляюць тыя, хто спрыяе такой дзейнасці або атрымлівае з яе прыбытак — ім можа пагражаць да дзесяці гадоў турмы.

Апытанка

• 5
• 1
• 4
• 7
• 0
• 0
• 0
• 0