Кім Чжу Э рэгулярна з'яўляецца на важных мерапрыемствах з бацькам, а цяпер яшчэ і атрымала высокую пасаду ў структуры, якая курыруе ядзерны патэнцыял краіны.
Фота: KCNA
Паводле паведамленняў паўднёвакарэйскіх СМІ са спасылкай на ўрадавыя крыніцы, кіраўнік КНДР Кім Чэн Ын прызначыў сваю 13‑гадовую дачку Кім Чжу Э на кіраўнічую пасаду ва Упраўленні ракетных сіл.
Магчыма, Кім Чжу Э паступова рыхтуюць да ролі ў кіраўніцтве Карэйскай народнай арміі: яе знаёмяць з дакладамі генералаў, а ў асобных выпадках яна нібыта аддае распараджэнні замест афіцыйнага кіраўніка ўпраўлення.
Лічыцца, што Кім Чжу Э нарадзілася ў канцы 2012 — пачатку 2013 года: цягам 2012 года яе маці Лі Соль Чжу не з’яўлялася на публіцы і не згадвалася ў паўночнакарэйскіх СМІ, што пазней звязалі з яе цяжарнасцю.
Імя Чжу Э стала вядомым дзякуючы расповедам амерыканскага баскетбаліста Дэніса Родмана, які падтрымліваў блізкія адносіны з сям’ёй Кімаў. У верасні 2013 года ён заявіў, што трымаў Чжу Э на руках.
Першае публічнае з’яўленне Кім Чжу Э адбылося ў лістападзе 2022 года ў 10‑гадовым узросце, калі яна суправаджала свайго бацьку падчас запуску міжкантынентальнай балістычнай ракеты «Хвасон-17».
Дзяржаўныя СМІ спачатку называлі яе «любімай дачкой» Кім Чэн Ына, але пазней пачалі характарызаваць як «паважаную дачку».
Пасля дзяўчына стала рэгулярна суправаджаць бацьку на розных важных мерапрыемствах.
У лютым 2023 года яна наведала спартыўныя спаборніцтвы: гульню ў футбол і перацягванне каната. У абодвух выпадках перамагла каманда Міністэрства абароны: у футболе яны абышлі прадстаўнікоў Кабміна з лікам 3:1, у перацягванні каната — 2:0. Чжу Э назірала за спаборніцтвамі разам з міністрам абароны Кан Сун Намам і членам Прэзідыума Палітбюро ЦК Працоўнай партыі Карэі Чо Ён Вонам, а таксама членамі ўрада і супрацоўнікі іншых міністэрстваў.
Тады ж Radio Free Asia паведаміла, што ўлады КНДР прымушаюць дзяўчат і жанчын, якія носяць імя Чжу Э, мяняць імёны, бо такое ж імя носіць 10‑гадовая дачка кіраўніка краіны.
Змяніць імя трэба было не пазней чым за тыдзень. Цяпер імя Чжу Э нібыта зарэзерваванае для асоб «найвышэйшай годнасці», у пералік якіх, верагодна, уваходзіць спадкаемніца сямейства Кімаў.
У сакавіку 2023 года дзяўчыну пабачылі ў куртцы за 2800 даляраў ад Dior. Яна з бацькам прысутнічала на запуску чарговай ракеты «Хвасон-17», здольнай дасягаць ЗША.
А сёлета 16 лютага яна прысутнічала на адкрыцці ў Пхеньяне вуліцы ў гонар загінулых у Курскай вобласці паўночнакарэйскіх вайскоўцаў.
У Нацыянальнай службе разведкі Паўднёвай Карэі раней зазначалі, што па-ранейшаму разглядаюць розныя варыянты планаў Пхеньяна пакінуць пасаду ў спадчыну (краінай кіруе ўжо трэцяе пакаленне Кімаў пачынаючы з 1950 года). Паўночнакарэйскім грамадзянам з нараджэння прышчапляюць думку пра тое, што ў жылах Кімаў цячэ ледзь не боская кроў і кіраваць краінай ім наканавана зверху.
Цалкам магчыма, што Кім Чэн Ын захоча працягнуць гэтую традыцыю.
Што праўда, у Кім Чэн Ына ёсць старэйшы сын Чэн Чжу, ён 2010 года нараджэння, але пра яго мала вядома. На фотах з афіцыйных мерапрыемствах яго не бачна, магчыма, ён, як і бацька ў маладосці, вучыцца ў Заходняй Еўропе.
Цяпер чытаюць
Беларуска кліча на вяселле зорку «Універа», які за вайну. Упрэгся ўвесь Threads7
Каментары