Дэталі аперацыі «Масада»: Ізраіль некалькі месяцаў таемна прывозіў запчасткі для дронаў і боепрыпасы ў Іран
Падобную тактыку скарыстала і Украіна для спецаперацыі «Павуцінне».
Ізраіль цягам некалькіх месяцаў перапраўляў запчасткі для сотняў квадракоптараў, начыненых выбухоўкай, — у чамаданах, грузавіках і кантэйнерах, — а таксама боепрыпасы, якія маглі запускацца з беспілотных платформаў, паведалі The Wall Street Journal людзі, знаёмыя з аперацыяй.
Невялікія групы, узброеныя гэтым абсталяваннем, размясціліся побач з іранскімі сістэмамі супрацьпаветранай абароны і пускавымі ўстаноўкамі для ракет. Калі атака Ізраіля пачалася, частка гэтых груп знішчала супрацьпаветраную абарону, у той час як іншыя ўдарылі па ракетных установачных комплексах у момант, калі тыя выязджалі са сховішчаў і рыхтаваліся да запуску.
Гэта аперацыя часткова тлумачыць абмежаваны характар адказу Ірана на ізраільскія атакі.
Гэты прыём быў выкарыстаны праз некалькі тыдняў пасля таго, як Украіна задзейнічала падобную тактыку: дроны, схаваныя ў дахах кантэйнераў, былі перакінуты ў Расію і атакавалі дзясяткі самалётаў, якія выкарыстоўваліся для нападаў на ўкраінскія гарады.
Аперацыя ізраільскай разведкі «Масад» была накіраваная на знішчэнне пагроз для ізраільскай авіяцыі і ракет, перш чым тыя маглі быць запушчаны па гарадах. Паводле адной з крыніц WSJ, групы на месцы знішчылі дзясяткі ракет яшчэ да іх запуску ў першыя гадзіны атакі. Ваенна-паветраныя сілы Ізраіля таксама надавалі асаблівую ўвагу знішчэнню СПА і ракет у першыя дні кампаніі.
У выніку Іран выпусціў каля 200 ракет па Ізраілі. Аднак Іран мае значна большыя рэсурсы, якія можа выкарыстаць для больш сур’ёзных нападаў.
У суботу ў некаторых іранскіх газетах з’явілася папярэджанне ад іранскай разведкі з заклікам пільна сачыць за магчымым выкарыстаннем Ізраілем пікапаў і грузавікоў для запуску дронаў.
Дроны рэгулярна выкарыстоўваюцца Ізраілем у Іране. У 2022 годзе ён выкарыстаў квадракоптары з выбухоўкай для атакі на вытворчасць іранскіх дронаў у Керманшаху. Праз год — атакаваў з дронаў боепрыпасны завод у Ісфахане.
Падрыхтоўка да цяперашняй аперацыі з выкарыстаннем дронаў ішла гадамі. Ізраіль ведаў, дзе Іран захоўвае ракеты ў стане гатоўнасці, але трэба было атрымаць магчымасць ударыць па іх з улікам вялікай тэрыторыі краіны і яе аддаленасці ад Ізраіля.
«Масад» перапраўляў квадракоптары праз камерцыйныя каналы, часам з дапамогай людзей, якія нічога не падазравалі. Агенты на месцы забіралі боепрыпасы і перадавалі іх групам. Лідары гэтых груп праходзілі падрыхтоўку ў трэціх краінах, а затым навучалі свае каманды.
Групы назіралі за тым, як Іран выкочваў ракеты, і ўдаралі па іх, перш чым тыя маглі быць усталяваны для запуску. «Масад» ведаў, што грузавікі, якія перавозяць ракеты да пускавых установак, — гэта слабое месца: Іран меў у чатыры разы больш ракет, чым машын для іх транспарціроўкі.
Групы знішчылі дзясяткі такіх грузавікоў. Яны працягвалі дзейнічаць на месцы нават у глыбокую ноч на пятніцу.
Гэтыя аперацыі — і публічнае раскрыццё інфармацыі пра іх — маюць і дадатковы эфект, адзначыла Сіма Шайн, былая кіраўніца іранскага дэпартамента «Масада»:
«Ніводзін чалавек у іранскай эліце не можа быць упэўнены, што ізраільская разведка не ведае пра яго і што ён не стане цэллю», — сказала яна. — «Справа не толькі ў нанесенай шкодзе, але і ў нервовасці, якую гэта выклікае».
Рыту Дакоту абвінавацілі, што яна тэрмінова распрадала нерухомасць у Расіі амаль на $2 мільёны. Яна адказала8
Каментары