КНДР адкрыла курорт «сусветнага класа». Ён можа быць арыентаваны на расійскіх турыстаў ФОТЫ
Паўночная Карэя завяршыла будаўніцтва маштабнага турыстычнага курорту «Вансан-Кальма» — гэта адзін з прыярытэтных праектаў лідара КНДР Кіма Чэн Ына. Пхеньян пазіцыянуе яго як «культурны курорт сусветнага класа», заявіла дзяржаўнае агенцтва Цэнтральнае тэлеграфнае агенцтва Карэі (ЦТАК).
Магчыма, у будучыні туды змогуць трапіць і іншаземцы — перш за ўсё расіяне, бо Паўночная Карэя як турыстычны кірунак, пачынаючы з мінулага года, паступова набірае папулярнасць у Расіі, піша Бі-бі-сі.
Курорт размешчаны на ўсходнім узбярэжжы, у горадзе Вансан на паўвостраве Кальма. Урачыстае адкрыццё прайшло 24 чэрвеня, на ім, як паведаміла ЦТАК, прысутнічаў пасол Расіі ў КНДР Аляксандр Мацэгора.
Для мясцовых турыстаў курортная зона адкрыецца 1 ліпеня, калі яна будзе даступная і іншым грамадзянам — пакуль не паведамляецца.
Курорт размешчаны на ўчастку пляжу даўжынёй 4 км і здольны прыняць да 20 000 наведвальнікаў, сцвярджаюць у КНДР. Ён уключае ў сябе «аб’екты для марскога купання, розныя спартыўныя і забаўляльныя збудаванні» і «абсталяваны ўсім неабходным для дэманстрацыі прыгажосці маляўнічага ўсходняга ўзбярэжжа ў любую пару года». На тэрыторыі, як заявілі, знаходзяцца гатэлі, рэстараны, гандлёвыя цэнтры і аквапарк — аднак пацвердзіць гэтыя звесткі пакуль немагчыма.
Кім Чэн Ын яшчэ ў першыя гады свайго кіравання праяўляў жывую цікавасць да развіцця турыстычнай галіны краіны, і праект гэтай турыстычнай зоны лічыўся ключавым, кажуць аналітыкі.
Кім паставіў мэтай ператварыць Вансан, горад, дзе ён праводзіў дзяцінства і дзе ў многіх прадстаўнікоў паўночнакарэйскай эліты ёсць прыватныя вілы, у турыстычны цэнтр вартасцю ў мільярды долараў. Планы былі ўпершыню анансаваныя больш за 10 гадоў таму і з таго часу істотна пашырыліся.
«Турызм можа стаць магутным рухавіком развіцця эканомікі, стымулам для культурнага ўнёску і рэгіянальнага росквіту», — заявіў ён пасля заканчэння будаўніцтва.
Паўночнакарэйскі лідар з «вялікім задавальненнем» заявіў, што будаўніцтва курорту ўвойдзе ў гісторыю як «адзін з найбольшых поспехаў года», і дадаў, што КНДР пабудуе яшчэ больш маштабных турыстычных зон «у найкарацейшыя тэрміны».
На апублікаваных ЦТАК фотаздымках бачна, як паўночнакарэйскі лідар сядзіць на крэсле і назірае за чалавекам, які спускаецца з горкі ў басейн, а таксама выходзіць на пляж у касцюме.
Кіма суправаджалі яго дачка Кім Чжу Э і жонка Лі Соль Чжу. Паўднёвакарэйскія СМІ, прааналізаваўшы фота з Пхеньяна, паведамілі, што на Чжу Э, магчыма, быў гадзіннік Cartier — нягледзячы на тое, што такія прадметы класа «люкс» забароненыя для ўвозу ў Паўночную Карэю ў рамках санкцый ААН, уведзеных з-за яе ядзернай праграмы.
Першапачаткова курорт планавалі адкрыць у кастрычніку 2019 года, але будаўніцтва затрымалася, а затым пачалася пандэмія каранавірусу.
Падчас пандэміі Паўночная Карэя была цалкам закрытая для турыстаў і зноў адкрыла межы толькі ў жніўні 2023 года. У мінулым годзе краіна ўпершыню пасля пандэміі дазволіла ўезд расійскім турыстам, у маі гэтага года аднавіла рух цягніка Расон— Уладзівасток, а 25 чэрвеня на Яраслаўскі вакзал у Маскве прыбыў пасажырскі цягнік з Пхеньяна — першы за пяць гадоў.
У студзені 2025 года старшыня ўрада Прыморскага краю паведаміла, што за папярэдні год у КНДР пабывала 1,5 тыс. расійскіх турыстаў. Некаторыя турысты ездзілі на горналыжныя курорты, а расійскія дзеці пабывалі ў карэйскіх летніх лагерах. Паводле яе слоў, у 2024 годзе колькасць авіярэйсаў па маршруце Уладзівасток — Пхеньян павялічылася да пяці на тыдзень. У лютым гэтага года КНДР кароткачасова пусціла турыстаў з Вялікабрытаніі, Францыі, Германіі і Аўстраліі. Яны перасеклі мяжу з Кітаем. Аднак праз некалькі тыдняў турызм зноў нечакана спыніўся без тлумачэння прычын.
Рован Бірд, сузаснавальнік турфірмы Young Pioneer Tours, расказаў BBC, што спадзяваўся, што Паўночная Карэя адкрыецца для міжнароднага турызму больш шырока, але гэтага не адбылося.
«Ключавымі славутасцямі застануцца Пхеньян, дэмілітарызаваная зона і іншыя аб’екты ў бруталісцкім ці камуністычным стылі, якія традыцыйна цікавяць міжнародных турыстаў», — лічыць ён.
Аднак дырэктар туркампаніі Uri Tours Эліёт Дэвіс адзначае, што Паўночная Карэя захоўвае «нішавую прывабнасць» для падарожнікаў, якія цікавяцца незвычайнымі напрамкамі.
«Цікава адчуць знаёмы досвед, напрыклад, паездку на пляжны курорт, але ў асяроддзі ўнікальнага культурнага кантэксту Паўночнай Карэі», — лічыць ён.
60‑гадовая п’яная беларуска ператварыла палёт з Парыжа ў Вільню ў кашмар3
Каментары