У выпадку нападу расійскія сілы ў Калінінградзе будуць нейтралізаваныя імгненна — камандуючы сіламі ЗША
Амерыканская армія і яе саюзнікі здольныя ўзяць Калінінград пад агнявы кантроль «за нечувана кароткі тэрмін — хутчэй, чым мы раней маглі гэта зрабіць», сказаў камандуючы арміяй ЗША ў Еўропе і Афрыцы генерал Крыстафер Донах'ю.
Армія ЗША і яе саюзнікі з НАТА распачынаюць рэалізацыю новага плана «Лінія стрымлівання на ўсходнім флангу», які накіраваны на ўзмацненне патэнцыялу сухапутных сілаў і павышэнне функцыянальнай спалучальнасці ВПК у межах альянсу, заявіў у сераду камандуючы арміяй ЗША ў Еўропе і Афрыцы генерал Крыстафер Донах'ю на першай канферэнцыі LandEuro ў Вісбадэне, Германія.
У рамках плана супрацьдзеяння расійскай пагрозе і забеспячэння глабальнага стрымлівання армія ЗША і яе саюзнікі распрацоўваюць стандартызаваныя, арыентаваныя на даныя сістэмы і воблачную каардынацыю, адзначыў генерал Донах'ю. Яго заявы цытуе выданне DefenceNews.
Амерыканцы, як і НАТА, у якасці першага кроку засяроджваюцца на краінах Балтыі, «каб паспрабаваць давесці да таго, як на самой справе зрабіць так, каб і прамысловасць, і краіны дакладна ведалі, якія патрабаванні стаяць — у канчатковым выніку гэта цяпер вядома як Лінія стрымлівання на ўсходнім флангу», — сказаў Донах'ю.
«Мы ведаем, што мы павінны распрацаваць, і сцэнар выкарыстання, які мы ўжываем [для стрымлівання] з зямлі», — сказаў ён. «Сухапутная сфера не траціць значэння, яна становіцца больш важнай. Цяпер вы можаце забяспечваць [зоны абмежавання доступу / забароны зоны доступу] A2AD з зямлі. Цяпер вы можаце браць пад кантроль мора з зямлі. Усё гэта мы назіраем ва Украіне».
У якасці прыкладу Донах'ю прывёў Калінінградскую вобласць Расіі, акружаную НАТА з усіх бакоў. Амерыканская армія і яе саюзнікі здольныя ўзяць яе пад агнявы кантроль «за нечувана кароткі тэрмін — хутчэй, чым мы раней маглі гэта зрабіць».
«Мы ўжо гэта спланавалі і ўжо распрацавалі. Праблема масы і імпульсу, якую Расія ставіць перад намі… У нас ёсць сілы, каб быць пэўнымі, што мы можам вырашыць гэтую праблему масы і імпульсу», — сказаў Донах'ю.
План НАТА ўключае сістэму для абмену данымі. НАТА ўжо набыла гэтую сістэму, сказаў Донах'ю, маючы на ўвазе Maven Smart System ад кампаніі Palantir — платформу штучнага інтэлекту, якая апрацоўвае велізарную колькасць даных і хутка аналізуе інфармацыю, што дапамагае камандзірам у прыняцці рашэнняў.
«Мы ўжо дакладна ведаем, што нам трэба зрабіць з воблакам, і мы дакладна ведаем тып беспілотных сістэм, брыгад, усяго астатняга, што нам для гэтага трэба», — сказаў Донах'ю.
Як ён адзначыў, «мы хочам, каб усё было апцыянальна кіраваным» — як сістэма супрацьпаветранай абароны, так і дальнабойнай артылерыі.
У студзені 2021 года выданне Over Defense, выкарыстоўваючы даныя амерыканскай арганізацыі Center for Naval Analyses (CNA), апісала сцэнарый прэвентыўнага ўдару НАТА па Калінінградскай вобласці, які прадугледжвае ліквідацыю чатырох асноўных цэляў у гэтым рэгіёне.
Згодна з публікацыяй, гэтым ударам будуць знішчаныя пускавыя ўстаноўкі балістычных ракет малой дальнасці, здольныя пераносіць ядзерную зброю (маюцца на ўвазе перш за ўсё ракетныя комплексы «Іскандэр»), удар будзе нанесены па караблях і інфраструктуры Балтыйскага флота, будуць знішчаныя зенітныя ракетныя сістэмы С-400, якія знаходзяцца ў рэгіёне, а «расійскія войскі ў Калінінградзе будуць нейтралізаваныя для гарантавання бяспекі ў краінах Балтыі і Сувалкскім калідоры».
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ29
Каментары