У Ашмянскім раёне затрымалі злодзея, які краў крыжы і агароджы з могілак
Міліцыя затрымала жыхара Ашмянскага раёна, які арганізаваў амаральны, але прыбытковы «бізнэс» — краў металічныя крыжы, агароджы і ланцугі з могілак, а потым здаваў іх на металалом. Агульная вага выкрадзенага складае не менш за 15 тон.
Як паведамляе УУС Гродзенскага аблвыканкама, 40-гадовы мужчына кінуў асноўную працу і пачаў зарабляць на крадзяжах з пахаванняў. Ён выбіраў пераважна закінутыя і занядбаныя магілы, разлічваючы, што там зніклыя элементы ніхто не заўважыць або не заявіць пра гэта.
Злачынца дзейнічаў у чатырох раёнах: Смаргонскім, Астравецкім, Ашмянскім і Маладзечанскім. Яго затрымалі адразу пасля чарговага крадзяжу дзякуючы аператыўным дзеянням супрацоўнікаў крымінальнага вышуку.
Злачынства раскрылася пасля таго, як у Астравецкі РАУС звярнуўся мужчына, які паведаміў пра знікненне двух металічных крыжоў з магілы сваякоў. Гэта і стала пачаткам расследавання.
Цяпер супраць затрыманага распачалі крымінальную справу.
Каментары