У Польшчы ў беларускай сям’і забралі дзяцей з-за пратэрміноўкі ў афармленні дакументаў. Суд вярнуў дзяцей дадому
Раённы суд у Шчацінку пастанавіў вярнуць двух дзяцей беларускай сям’і, у якой іх раней забралі з-за несвоечасовага афармлення карты нараджэння малодшага дзіцяці, піша Most.
Галоўнай прычынай забрання дзяцей стала несвоечасовае афармленне і перадача карты нараджэння. Гэта магло здарыцца з-за памылак медыцынскага персаналу і недастатковай інфармаванасці бацькоў аб польскім заканадаўстве.
У студзені 2025 года ў беларускай сям’і, што пражывае ў Польшчы, нарадзіўся сын.
Бацькі не ведалі, што паводле закона доктар ці акушэрка павінны аформіць карту нараджэння дзіцяці на працягу трох дзён. Нягледзячы на спробы атрымаць дакумент у бальніцы і зарэгістраваць сына ў ЗАГСе, сканчэнне ўстаноўленага тэрміну зрабіла гэта немагчымым.
У Польшчы пасля нараджэння дзіцяці доктар або акушэрка абавязаныя на працягу 3 дзён аформіць карту нараджэння, а бацькі — на працягу 21 дня зарэгістраваць дзіця ва Управе запісаў актаў грамадзянскага стану (USC) асабіста або анлайн праз партал gov.pl. Пры рэгістрацыі дзіцяці прысвойваецца нумар PESEL і афармляецца прапіска (meldunek). Несвоечасовая падача дакументаў можа прывесці да адміністрацыйных наступстваў і ўскладніць атрыманне дапамогі, медыцынскага абслугоўвання — а ў некаторых выпадках нават да адабрання дзіцяці.
Уладальнік кватэры, з якім сям’я мела канфлікт, паведаміў пра сітуацыю ў гарадскі Цэнтр дапамогі сям’і. Неўзабаве ў дом прыйшла паліцыя і забрала абодвух дзяцей — месячнага хлопчыка і трохгадовую дзяўчынку. Гэта адбылося больш чым праз месяц пасля нараджэння сына. Дзяцей змясцілі ў сямейны дзіцячы дом.
Юрыдычная дапамога
Сям’і дапамаглі юрысты з Інстытута Ordo Iuris. Яны падалі ў суд хадайніцтва аб змене мер па справе і пра складанне акта нараджэння хлопчыка, паказаўшы, што бацькі здольныя забяспечыць дзецям годныя ўмовы жыцця і да адабрання належна пра іх клапаціліся.
9 ліпеня Акруговы суд у Шчацінку зацвердзіў акт нараджэння дзіцяці. А ўжо 24 ліпеня суд вынес рашэнне аб вяртанні дзяцей у бацькоўскі дом.
Сям’я будзе знаходзіцца пад наглядам судовага куратара і абавязана супрацоўнічаць з сямейным асістэнтам. Раз на паўгода бацькі павінны прадстаўляць куратару звесткі пра стан здароўя дзяцей.
Цяпер чытаюць
«Яны кашмарылі ўсіх». Суседзі пра сям’ю Ліпскіх, якія «планавалі забойства больш за 40 чалавек»1
Каментары