Прыпынілі паўнамоцтвы намесніка кіраўніка БАЖ Барыса Гарэцкага. Яго падазраюць у харасменце
Праўленне Беларускай асацыяцыі журналістаў на сваім пасяджэнні 14 жніўня разгледзела сітуацыю вакол магчымых фактаў харасменту з боку намесніка старшыні БАЖ Барыса Гарэцкага. Паведамляецца, што з інфармацыяй пра такія абвінавачанні да праўлення звярнуўся сам Гарэцкі.
Улічваючы сур’ёзнасць абвінавачанняў, праўленне БАЖ вырашыла распачаць разбіральніцтва.
На яго час выкананне Барысам Гарэцкім прадстаўнічых і кіруючых функцый у БАЖ прыпыняецца.
Разбіральніцтва будзе ўключаць збор інфармацыі, яе ацэнку і прыняцце праўленнем выніковага рашэння.
Збор інфармацыі будзе рабіцца да 1 кастрычніка 2025 года ад магчымых пацярпелых ад дзеянняў Барыса Гарэцкага.
Патрэба ў разбіральніцтве ўзнікла пасля таго, як 10 жніўня Барыс Гарэцкі апублікаваў у фэйсбуку пост, у якім прызнаўся, што яго нельга лічыць «маральным ідэалам» і што некаторыя яго словы могуць разглядацца як дамаганні.
Адначасова ён падкрэсліў, што ніколі не намякаў на аддзячванне за сваю працу па падтрымцы СМІ і журналістаў і не ўдзельнічаў у сумнеўных адносінах, у тым ліку не дасылаў нікому інтымныя фатаграфіі.
У каментары выданню «Люстэрка» Барыс Гарэцкі заявіў, што пытанне трэба вырашаць сістэмна: распачаць расследаванне, стварыць працэдуры і распрацаваць палітыку арганізацыі для такіх выпадкаў.
У той жа час кіраўнік БАЖ Андрэй Бастунец расказаў, што ў асацыяцыі вырашылі абмеркаваць сітуацыю. На найбліжэйшым сходзе праўлення Гарэцкі прадставіць сваю версію, а арганізацыя пазней, калі будзе неабходна, падзеліцца інфармацыяй. Паводле слоў Бастунца, акалічнасці справы і прычыны публікацыі паста Гарэцкага тады былі невядомыя — магчыма, гэта была эмацыйная рэакцыя.
Цяпер чытаюць
Расіянін з судзімасцю заняўся дабрачыннасцю ў Беларусі. У некаторых пасля дапамогі Дзядзі Яшы пачынаюцца праблемы4
Каментары
У таго, хто тут піша ад імя "Пытанне", усе пытанні ў выглядзе дамаганняў-прэтэнзій. І нічога не даходзіць. З такім пацанскім апломбам "Нешта я не зразумеў" лепш не камунікаваць увогуле з людзьмі, не толькі з жанчынамі.