Гурту «Дразды», які збіраўся кідаць сцэну праз забарону выступаць у буйных гарадах, дазволілі абласныя цэнтры. Але не Мінск
У спісе гастрольных гарадоў гурта «Дразды» з’явіліся пяць абласных цэнтраў, хоць раней, як паведамляў сам калектыў, ім не дазвалялі там выступаць. У інтэрв’ю Sputnik саліст гурта Віталь Карпанаў распавёў, што змянілася ў жыцці калектыву.
У канцы вясны Карпанаў зрабіў гучную заяву — «Дразды» спыняць выступленні. Такое рашэнне саліст гурта патлумачыў тым, што ім не даюць магчымасці ладзіць канцэрты ў абласных цэнтрах, у тым ліку ў беларускай сталіцы.
Паводле слоў Карпанава, яго заява не засталася незаўважанай з боку чыноўнікаў.
«У той жа дзень нам патэлефанавалі важныя людзі і сказалі: «Хлопцы, як вам нельга граць? Чаму? Хто сказаў, што вам нельга граць? Хто вам не дае гастрольку?» І нам у той жа дзень пасля выхаду інтэрв’ю далі дабро на тое, што мы цяпер будзем граць і ў абласных цэнтрах», — заявіў Карпанаў.
Музыка дадаў, што ў гастрольным спісе ёсць і Бабруйск, які раней таксама быў пад забаронай для іх калектыву.
Карпанаў падзякаваў усім, хто «прыняў такое правільнае, у першую чаргу, для дзяржавы рашэнне».
Аднак ён канстатаваў, што на выступленні ў Мінску гурт атрымаў адмову.
«Вось тут сумная навіна. Мы па ўсіх гарадах падалі дакументы. Гэты працэс няпросты — гэта гастрольнае пасведчанне, гэта спіс артыстаў, песень — усё вывяраецца. І падалі мы дакументы на Палац спорту, бо нас чакае і горад Мінск, і нашы слухачы ў Мінску, і ў Мінскай вобласці. Больш за тое, скажу, што мы падалі заяўкі на дзве ці на тры даты. І мы атрымалі адмову», — падкрэсліў Карпанаў.
У канцы мая беларускі гурт «Дразды» абвясціў пра развітальнае турнэ, якое павінна было стаць завяршэннем 20-гадовай творчай дзейнасці калектыву.
«Мы разумеем, што так далей нельга. Мы стаміліся, вядома. Стаміўся, хутчэй за ўсё, наш слухач, таму што некаторыя людзі прыходзяць па 15 разоў на наш канцэрт. Але мы не маем магчымасці граць у абласных гарадах: у нас ёсць цяжкасці ў паразуменні з-за гіперактыўных блогераў, якія на сёння — ужо не будзем хаваць — нават адматалі тэрмін», — заявіў Віталь Карпанаў.
Прозвішчы блогераў не называліся, але можна меркаваць, што гутарка ішла пра Вольгу Бондараву і яе паплечнікаў. Нягледзячы на падкрэслена праўладную пазіцыю гурта і асабіста Віталя Карпанава, у тым ліку і ў 2020 годзе, «Дразды» падвяргаліся атакам з боку Бондаравай, прычынай чаго стала выкарыстанне ў іх творчасці беларускай мовы.
Цяпер чытаюць
«Не хачу чуць «спердаляй да Украіны» толькі таму, што размаўляю з бацькамі па тэлефоне на рускай». Беларусы дзеляцца, чаму вяртаюцца з Польшчы71
Каментары