Рыбалоўная крама адсудзіла ў жанчыны 500 рублёў за водгук на адну зорку на Яндэксе
Жанчына напісала, што вуда паламалася пасля першай жа рыбалкі. Але быў адзін нюанс.
Уладальніца рыбацкай крамы судзілася з жанчынай з-за негатыўнага водгуку ў інтэрнэце. Прадпрымальніца стварыла профіль крамы на картах у Google і Яндэкс. Гэтыя старонкі яна выкарыстоўвала для прасоўвання крамы.
Усё ішло няблага. На Яндэксе ў крамы было 13 станоўчых водгукаў і максімальная сярэдняя адзнака «5». Але 17 студзеня там раптам з'явіўся рэзка негатыўны водгук на адну зорку. Гучаў ён так: «Купіла вуду для дзіцяці на дзень нараджэння, у першы дзень зламалася. Свята сапсаванае».
Уладальніца крамы пайшла ў суд. Яна заявіла, што аўтарка водгуку наогул ні разу не была ў яе краме і тым больш нічога там не купляла. Пазоўніца адзначыла, што негатыўны і хлуслівы водгук нанёс шкоду рэпутацыі яе крамы, а таксама маральныя пакуты асабіста ёй.
«У выніку дзеянняў адказчыка пазоўніца пацярпела маральныя пакуты, якія праявіліся ў бяссонні, стрэсе, занепакоенасці пра лёс сваёй прадпрымальніцкай дзейнасці, была вымушаная прымаць супакаяльныя прэпараты», — гаворыцца ў прэс-рэлізе Вярхоўнага суда.
Прадпрымальніца запытала ў аўтаркі водгуку кампенсацыю ў 20 тысяч рублёў, а таксама папрасіла суд прымусіць жанчыну выдаліць водгук.
Адказчыца ў судзе прызнала, што нічога ў краме не купляла, але не пагадзілася з тым, што яна павінна нешта плаціць. Навошта яна тады пакінула такі водгук, застаецца загадкай. Жанчына яшчэ да суда свой водгук выдаліла, але адзнака ў адну зорку на карце засталася.
Эканамічны суд Мінска ў выніку ўлічыў, што водгук ужо выдалены, і задаволіў пазоў толькі часткова. Замест 20 тысяч рублёў ён пастанавіў выплаціць прадпрымальніцы 500 рублёў у якасці кампенсацыі маральнай шкоды.
Цяпер чытаюць
На фронце загінуў сын экс-кандыдата ў прэзідэнты Дзмітрыя Уса. Іван ваяваў за Расію3
Каментары