7 верасня стала вядома, што ў гарах Кабардзіна-Балкарыі, у Прыэльбруссі, знайшлі цела 26-гадовага беларуса. Расказваем, што вядома пра яго і пра абставіны трагедыі.
Хлопца звалі Іван Сукач, ён нарадзіўся 13 чэрвеня 1999 года.
Мяркуючы па сацсетках, Іван скончыў ліцэй БДУ, прычым з залатым медалём. Падчас вучобы хлопец асабліва цікавіўся матэматыкай: напрыклад, ён апынуўся ў прызёрах алімпіяды па матэматыцы, якую ладзілі для школьнікаў пры БДУ. Займаўся ён і адзінаборствамі.
Цяперашні паход — не першыя горы ў жыцці Івана. Яшчэ тры гады таму ён публікаваў у сацсетках фота з горнага рэгіёну.
У апошні час Іван працаваў у ІТ. Ён прыехаў у Кабардзіна-Балкарыю адзін, перад паходам у горы спыніўся ў вёсцы Церскол.
Апошні раз Іван выходзіў на сувязь 3 верасня. У гэты дзень беларус выправіўся ў горны паход. Ішоў зноў адзін, свой маршрут, наколькі вядома, не зарэгістраваў. Ён збіраўся падняцца з вышыні 1900 метраў да 3600 метраў.
Ужо на вышыні 2 тысячы метраў у некаторых людзей могуць з'явіцца сімптомы горнай хваробы, таму што паветра на такой вышыні робіцца больш разрэджаным. А ўжо на вышыні ад 2500 метраў гэтыя сімптомы — звычайная з'ява, таму пад'ём на такую вышыню мусіць быць паступовым.
Іван пайшоў у той паход, апрануты ў чорную байку, чорную майку, чорныя шорты і белыя красоўкі. 3 верасня ў вёсцы Церскол, дзе спыніўся Іван, было 14 градусаў, і з кожным дадатковым кіламетрам вышыні тэмпература падае ў сярэднім на 6.5 градусаў.
Адзін з расійскіх тэлеграм-каналаў апублікаваў відэа, як Іван пачынае той паход. Калі гэтае відэа сапраўднае, то хлопец на ім ідзе без заплечніка, нясе ў руках штатыў і бутэльку з вадой.
Івана шукалі некалькі дзён, у пошуках паўдзельнічалі 22 чалавекі. Расійскае МНС выкарыстала для пошукаў верталёт.
У выніку цела хлопца знайшлі на вышыні 2800 метраў ля вадаспада Церскол. Разбірацца ў трагедыі будуць расійскія следчыя. Папярэдняя версія — Іван сарваўся ў бездань.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Міс Беларусь» усё больш нагадвае конкурс прыгажосці ў гарэме11
Каментары
Ён быў на "ты" з вышынёй і з гарамі? А з імі трэба быць на "Вы".