У Варшаве знікла 38-гадовая беларуска. Яна ўдзельнічала ў намётавым гарадку пасля выбараў-2006
Валерыю Саўчанкаву апошні раз бачылі 5 верасня.
У Варшаве шукаюць 38-гадовую беларуску Валерыю Саўчанкаву.
Апошні раз яе бачылі 5 верасня ў 8-9 раніцы ў раёне Таргувек у Варшаве, на вуліцы Бажымоўска, 25 (станцыя метро Троцкая).
Дзяўчына была з заплечнікам, адзетая ў сукенку (колер невядомы) і сандалі. Валасы пафарбаваны ў блонд, носіць акуляры, на абодвух перадплеччах ёсць каляровыя татуіроўкі (адна з іх — выява Фенікса).
Паведамляецца, што дзяўчына хварэе на цукровы дыябет.
Як піша «Еўрарадыё», студэнткай Валерыя ўдзельнічала ў намётавым гарадку на Кастрычніцкай плошчы ў Мінску пасля выбараў 2006 года. Але знаёмыя не звязваюць яе знікненне з палітыкай.
У паліцыю ўжо паведамілі пра знікненне. Тых, хто мае інфармацыю пра месцазнаходжанне Валерыі, просяць званіць па нумарах 112 ці +48 577 714 882.
Каментары