На УНС зацвердзілі праграму сацыяльна-эканамічнага развіцця Беларусі на пяцігодку. У ёй сем прыярытэтаў

Праграма вызначае сем асноўных прыярытэтаў на пяцігодку.

Першым з іх з’яўляецца нацыянальная дэмаграфічная бяспека — захаванне насельніцтва, умацаванне здароўя і падтрымка сям’і.

Другі прыярытэт — развіццё чалавечага патэнцыялу праз якасную адукацыю і выхаванне гарманічнай, патрыятычнай асобы.

Трэці — стварэнне зручнага і якаснага асяроддзя для жыцця.

Чацвёрты напрамак прадугледжвае павышэнне канкурэнтаздольнасці эканомікі, паскарэнне тэхналагічнага развіцця і лічбавую трансфармацыю.

Пятым прыярытэтам сталі моцныя рэгіёны, шостым — умацаванне абараназдольнасці дзяржавы і развіццё абароннай галіны эканомікі, сёмым — раскрыццё турыстычнага патэнцыялу краіны. Для кожнага з напрамкаў прапісаны канкрэтныя задачы.

Павялічыць

Прэм’ер-міністр Аляксандр Турчын: прэзентуючы праграму, адзначыў, што яе рэалізацыя дазволіць грамадзянам адчуць паляпшэнне якасці жыцця ўжо цягам наступных пяці гадоў. Яна нібыта цалкам забяспечана фінансаваннем, а крыніцы сродкаў разлічаны з улікам рэальных магчымасцяў эканомікі.

Выкананне пастаўленых задач будзе штогод разглядацца на Усебеларускім народным сходзе, а пры неабходнасці ў праграму могуць уносіцца змены.

Плануецца, што за пяцігодку валавы ўнутраны прадукт краіны вырасце на 15,8%, у сярэднім не менш як на 3% штогод. Асобная ўвага надаецца дыверсіфікацыі экспарту і развіццю высокатэхналагічных вытворчасцяў — ад прамысловых робатаў і беспілотных сістэм да мікраэлектронікі, фармацэўтыкі і электрамабіляў.

Да 2030 года ўсе дарогі ад раённых цэнтраў да аграгарадкоў павінны атрымаць удасканаленае пакрыццё. Усяго запланавана рэканструяваць, пабудаваць або капітальна адрамантаваць не менш за 25 тысяч кіламетраў дарог. За пяць гадоў плануецца ўзвесці каля 5 мільёнаў квадратных метраў арэнднага жылля, што павінна дапамагчы прыцягненню кадраў у рэгіёны.

Сярод буйных інвестыцыйных праектаў — будаўніцтва другога завода па выпуску сульфатнай цэлюлозы, стварэнне вытворчасці поліпрапілену, дакладнага алюмініевага ліцця і трактароў высокай магутнасці. Таксама ў краіне з’явіцца Цэнтр развіцця прадпрымальніцтва, а доля малога і сярэдняга бізнэсу ў валавай дадатковай вартасці павінна дасягнуць 33%.

Асобны акцэнт робіцца на развіцці абароннай прамысловасці, укараненні інавацыйных узораў узбраення і вайсковай тэхнікі.

У аграпрамысловым комплексе запланавана будаўніцтва больш за 200 малочнатаварных і пяці буйных свінакомплексаў.

У сацыяльнай сферы ставіцца мэта павялічыць нараджальнасць (на 1 тыс. чалавек з 6,5 да 7), знізіць смяротнасць і падоўжыць сярэднюю працягласць жыцця да 76,5 года. Плануецца ўзвесці каля 20 дзіцячых садоў і 27 школ, а таксама пашырыць магчымасці дадатковай адукацыі дарослых.

У ахове здароўя ставіцца задача ахапіць дыспансерызацыяй не менш за 95% дарослага насельніцтва і развіваць сетку міжраённых цэнтраў спецыялізаванай медыцынскай дапамогі.

У экалагічнай сферы плануецца павялічыць перапрацоўку цвёрдых камунальных і вытворчых адкідаў і ўвесці ў строй сем новых аб’ектаў па абыходжанні з цвёрдымі камунальнымі адкідамі.

У турызме за пяць гадоў плануецца пабудаваць і рэканструяваць каля 100 аб’ектаў, каб зрабіць галіну адным з драйвераў эканомікі.

На рынку працы галоўная мэта — забяспечыць баланс кадраў, не дапусціць іх адтоку і адначасова завабіць запатрабаваных спецыялістаў. Узровень забяспечанасці кадрамі павінен складаць не менш за 97%, з асаблівай увагай да моладзі і яе хуткай інтэграцыі ў эканоміку краіны.

• 1
• 0
• 17
• 3
• 0
• 0
• 0
• 0