Дзяржаўная газета спасылаецца на даклад Нямцова і Мілава «Пуцін. Вынікі. 10 гадоў».
У нумары газеты «Звязда» за 29 чэрвеня змешчаны артыкул Антона Запольскага пад загалоўкам «10 гадоў кіравання Пуціна. Што адбываецца сёння ў Расіі?».У ім аўтар не пакідае ад палітыкі былога расійскага прэзідэнта і сённяшняга кіраўніка ўраду камня на камні.
«Звязда» прыводзіць ажно 9 правальных пазіцый палітыкі Крамля. Сярод іх выбух карупцыі, катастрафічнае памяншэнне колькасці насельніцтва, павелічэнне сыравіннай залежнасці, павелічэнне колькасці тэрактаў, узрастанне ролі спецслужб, сацыяльнае расслаенне, затратныя гаспадарчыя і забаўляльныя праекты і спусташэнне пенсійнага фонду.
Прычым дзяржаўная газета вінаваціць ва ўсіх гэтых няшчасцях асабіста Пуціна, шматкроць спасылаючыся на даклад Нямцова і Мілава «Пуцін. Вынікі. 10 гадоў». Стостысячны наклад гэтага выдання быў канфіскаваны ўладамі Расіі. Аўтар публікацыі ў «Звяздзе» апісвае гэты факт такім чынам: «Замест таго, каб спрачацца, палемізаваць з высновамі даклада, аспрэчваць яго палажэнні, даказваць сваю эфектыўнасць, (улады Расіі) вырашылі дзейнічаць «
Парушаючы канстытуцыйнае права грамадзян на інфармацыю, вырашылі, як у старыя добрыя часы, апазіцыйную літаратуру ліквідаваць. Прычына — у дакладзе пададзеныя праўдзівыя вынікі кіравання Пуціна».Аўтар адначасова прыходзіць да высновы, што такія дзеянні ўладаў недарэчныя і толькі прыцягваюць увагу да апазіцыі.
Відавочна, гэткія публікацыі ў дзяржаўнай прэсе — проста рэха газавай вайны ды падрыхтоўка да надыходзячых прэзідэнцкіх выбараў. Аднак рыторыка публікацыі ўражвае. Ня часта дзяржаўная прэса піша аб канстытуцыйным праве грамадзян на інфармацыю і праўдзівасці апазіцыйнай літаратуры. Магчыма, з часам беларускія афіцыйныя СМІ звярнуць увагу і на тое, што адбываецца з апазіцыйнымі выданнямі ў нашай краіне.
Каментары