Каля пад’ездаў, дзе жывуць віцебскія меркаваныя «тэрарысты», дзяжурыць міліцыя
На некаторых сайтах з'явіліся паведамленні, што ў кватэрах, дзе жылі хлопцы, нехта павыбіваў вокны, але суседзі гэтага не пацвярджаюць.
Міліцыянт у цывільным цікавіцца асобаю кожнага, хто падыходзіць да дзьвярэй, і прапускае толькі тых, хто тут жыве альбо каго чакаюць гаспадары. Гэта — дзеля бясьпекі сваякоў падазраваных, патлумачыў супрацоўнік МУС.
Пасьля таго як прозьвішчы віцебскіх хлопцаў, якіх вінавацяць у тэракце 11 красавіка, зьявіліся ў інтэрнэце, такія захады сталі неабходныя, заявіў супрацоўнік міліцыі, які дзяжурыць каля пяціпавярховіка па вуліцы Рэпіна. На некаторых сайтах зьявіліся паведамленьні, што ў кватэрах, дзе жылі хлопцы, нехта павыбіваў вокны, але бліжэйшыя суседзі гэтага не пацьвярджаюць.
Зьвесткі пра тое, што сваякоў забралі невядомыя ў цывільным ды вывезьлі ў невядомым кірунку, таксама выклікаюць сумневы ў тых, хто жыве побач.
«Маці К. вельмі прыстойная жанчына, мы зь ёй вітаемся. Я ня чуў, каб нехта яе асуджаў ці агрэсіўна ставіўся да яе. Магчыма, сваякі зьехалі самі, каб ім не назалялі журналісты, або гэта зроблена ў інтарэсах сьледзтва», — мяркуе адзін з суседзяў.
Размаўляць з журналістамі пра сына маці затрыманага Ўлада К. катэгарычна адмовілася. Яна заявіла, што ў СМІ «перамешваюць бруд, а праўды ніколі ня скажуць»
Каментары