Старшыня Саюза журналістаў Расіі (СЖР) Усевалад Багданаў гатовы ўручыць кіраўніку Мінфіна РФ Аляксею Кудрыну за абарону інтарэсаў расійскіх СМІ ў Беларусі ганаровы знак «За заслугі перад журналісцкай супольнасцю».
«Я проста ганаруся нашым урадам, што яны могуць прымаць такія меры — гэта рэальная абарона інтарэсаў грамадства, каб наша грамадства ведала, што адбываецца ў Беларусі. Гэта абарона статусу журналіста», — заявіў Багданаў РІА Новости.
Раней Кудрын сказаў журналістам, што «ўрад РФ непакояць меры адміністрацыі Беларусі па стрымліванні або абмежаванні сродкаў масавай інфармацыі з Расіі». Паводле яго слоў, калі ўлады Беларусі будуць працягваць націскаць на расійскія СМІ, Расія можа абмежаваць крэдытную падтрымку гэтай краіны.
На думку старшыні СЖР,
у Беларусі «стаўленне да журналістыкі, як у нас у Савецкім Саюзе было 25 гадоў таму». «Яны лічаць, што журналісты — прапагандысты, павінны ведаць сваё месца, а гэта няправільны пункт гледжання», — сказаў ён.
Нагадаем, 27 мая на нарадзе аб сітуацыі на спажывецкім і валютным рынку Беларусі Аляксандр Лукашэнка запатрабаваў закрыць шэраг сродкаў масавай інфармацыі, у тым ліку расійскіх, фактычна абвінаваціўшы іх у нагнятанні ў краіне ажыятажнага попыту на валюту і тавары.
«Больш за ўсё істэрыі ў расійскіх сродках масавай інфармацыі, — заявіў Лукашэнка. — Я назіраю і за нашымі, перш за ўсё замежнымі, якія тут дзякуючы Адміністрацыі прэзідэнта сталі пануючымі сродкамі масавай інфармацыі, і за замежнымі. На другім месцы — нашы, якія выдаюцца тут. Я іх не называю, каб не ствараць ім рэйтынг, але зрабіце ўсё, каб гэтыя СМІ больш не прысутнічалі на нашай тэрыторыі». «І не таму, што мы хочам закрыць рот. Не, — працягнуў кіраўнік дзяржавы. — Падкрэсліваю: я за імі ўважліва назіраў, увесь ажыятаж пачаўся адтуль».
Андрэй Серада, БелаПАН.
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»7
Каментары