Фота ахвяры сямейнага гвалту выклікала скандал у Турцыі
На першай паласе турэцкай газеты Haber Turk быў змешчаны фотаздымак жанчыны, з аголенага боку якой тырчыць нож. Муж жанчыны, які, як мяркуецца, ударыў яе, ініцыяваў спрэчку. Пратэстоўцы ў Анкары пачалі ў красавіку заклікаць дзяржаву ўзяць пад абарону жанчын і дзяцей супраць хатняга гвалту і так званых забойстваў у імя гонару.
На фотаздымку — ахвяра, Сэфіка Этык, якая ляжала на насілках, калі ў чацвер яе павезлі ў шпіталь. Яна яшчэ жыла, калі рабіўся здымак, але памерла па дарозе.
Публікацыя фотаздымка выклікала гнеў і пратэсты, у тым ліку ў сям’і Этыкаў. Абаронца правоў жанчын Дэніз Бэйрам назвала гэта «медыягвалтам», што парушае правы ахвяры.
Фаціх Алтайлі, рэдактар газеты Haber Turk, што змясціла фотаздымак, абараняе сваю пазіцыю наступным чынам:
«Я хацеў, каб людзі ўбачылі, што хатні гвалт напраўду існуе. Я хацеў шакаваць людзей».Пратэстоўцаў, што адстойвалі правы ахвяры супраць «медыягвалту», Алтайлі назваў ідыётамі, што не ведаюць, якія менавіта захады змогуць упэўніць урад зрабіць нейкія крокі.
Турэцкі міністр сям’і і сацыяльнай палітыкі таксама раскрытыкаваў здымак: «Калі нехта думае, што вусцішныя ілюстрацыі прымусяць кагосьці задумацца, яму не варта забываць таксама пра псіхалагічнае здароўе грамадства і дзяцей».
Паводле даследаванняў, праведзеных у 2008 годзе, 42% турэцкіх жанчын падвяргаліся фізічнаму ці сэксуальнаму гвалту.Нягледзячы на тое, што ўрад робіць захады, каб паменшыць колькасць гэтых злачынстваў, іх, на думку праваабаронцаў, недастаткова.
Паводле даследаванняў Human Rights Association з 2005 года ў выніку хатняга гвалту былі забітыя 4190 жанчынаў. Цяперашні закон супраць хатняга гвалту называецца «Абарона сям’і». Дэніз Бэйрам так акрэслівае сучасную праблему: «На жанчын глядзяць не як на асобаў, а як на верных жонак, цнатлівых сёстраў, добрых маці і г.д.»
Цяпер чытаюць
У дзень, калі памілавалі палітвязня Дароніна, ягонай жонцы прысудзілі 8,5 гадоў калоніі за ўдзел у дваровым чаце6
Каментары