У Расеі губэрнатар расцаніў слэнгавае «фтопку» як «падрыхтоўку да забойства шляхам спаленьня»

Кіраўніцтва Ўладзімерскай вобласьці Расеі падало пазоў у суд на ўдзельнікаў інтэрнэт‑форуму kovrov.ru за паклёп і абразы. Удзельнікі форуму лічаць, што гэта спроба увесьці ў рэгіёне палітычную інтэрнэт‑цэнзуру. Сёньня —другі дзень судовага разьбіральніцтва.

Яшчэ ўвесну 2006 году кіраўнік Уладзімерскай вобласьці Мікалай Вінаградаў падаў заяву пра паклёп і абразы ў свой адрас у пракуратуру, міліцыю ды ФСБ. Кіраўніку рэгіёну не спадабалася, як на форуме гораду Каўрова Ўладзімерскай вобласьці абмяркоўваюць дзейнасьць рэгіянальнай адміністрацыі. У абразе адказнай асобы і паклёпе падазраваліся пяцёра ўдзельнікаў. Сьледчыя хутка высьветлілі, хто піша на форумы, выклікалі іх на допыты і нават сканфіскавалі «прылады злачынства» — кампутары.

Першай ахвярай палітычнай інтэрнэт‑цэнзуры стаў пазаштатны аглядальнік газэты «Владимирский край» Дзьмітры Ташлыкоў. Ён вінаватым сябе не прызнае, ды й сьледзтва не знайшло паклёпу ў ягоных выказваньнях. Тады справу ўсчалі па артыкуле «Абраза прадстаўніка ўлады».

«Мы пэўныя, што вынесьці абвінаваўчы прысуд у гэтай справе будзе дастаткова складана, бо сьледзтва абапіраецца на асобныя словы, вырваныя з кантэксту», — паведаміў адзін з удзельнікаў форуму Міхаіл. Паводле ягоных словаў, экспэрты‑лінгвісты двойчы старанна вывучылі крыўдныя выразы, але так і не змаглі сказаць, ці скіраваныя яны менавіта ў адрас губэрнатара. Затое экспэрты дакладна высьветлілі, што некаторыя абразы, якія губэрнатар вырашыў прыпісаць сваёй пэрсоне, насамрэч скіраваныя ў адрас іншых асобаў. Аднак кіраўнік Уладзімерскай вобласьці ня траціць надзеі і працягвае вышукваць паклёпы на сябе ў сеціве.

Як лічыць Міхаіл, гэткі досьвед барацьбы з іншадумствам — вельмі небясьпечны прэцэдэнт. «Бо мова інтэрнэт‑размоваў ужо настолькі своеасаблівая, што зь яе можна вырваць любы выраз і выкарыстоўваць супраць каго заўгодна, — кажа Міхаіл. — Напрыклад, выражэньне няўхвалы «фтопку». Самае простае ягонае значэньне — кінуць штосьці ў агонь. Але па ўказаньні вялікага начальніка яно можа быць вытлумачанае як падрыхтоўка да забойства шляхам спаленьня».

Мікалай Вінаградаў вядомы барацьбіт з «свабодай слова». Толькі ў 2004 годзе губэрнатар Уладзімерскай вобласьці і ягоная адміністрацыя падалі супраць мясцовых недзяржаўных друкаваных выданьняў больш за 20 судовых пазоваў.

Глядзі яшчэ:
У Расеі судзяць інтэрнаўта за словы «кацап» і «маскаль»

• 0
• 0
• 0
• 0
• 0
• 0
• 0
• 0