Каманду Еўропы узначальвае славуты Уладзімір Самсонаў.
Вечарам 28 кастрычніка ў будынку мінскай ратушы адбылася афіцыйная прэзентацыя матчу зорак настольнага тэніса, які пройдзе ў гэтыя выхадныя ў сталічным Палацы спорту.
29–30 кастрычніка ў турніры «2011 Інтэрспорт матч усіх зорак Еўропа супраць Азіі» сустрэнуцца за гульнявымі сталамі суперкаманды па пяць найлепшых гульцоў субкантынентаў.
«У гісторыі развіцця айчыннага настольнага тэніса, — адзначыў на прэзентацыі першы намеснік міністра спорту і турызму Рыгор Касячэнка, — міжнародны матч такога высокага ўзроўню праводзіцца на беларускай зямлі ўпершыню. Ганарымся,
што каманду Еўропы ў гэтым матчы ўзначальвае наш суайчыннік, вядомы тэнісіст Уладзімір Самсонаў».
«Калі я прыязджаў у Беларусь два гады таму, тэмпература ў горадзе была мінус 20, — усміхаючыся, заўважыў прэзідэнт Еўрапейскага саюза настольнага тэніса Стэфана Бозі. — Але нягледзячы на адмоўную тэмпературу, прыём быў вельмі цёплым. Мы абмяркоўвалі мару, якая была ў нас у сэрцах, — правесці турнір зорак у Мінску. Сёння, як бачыце, гэта мара спраўдзілася — тут сабраліся найлепшыя гульцы Азіі і Еўропы. Заўтра пачнецца грандыёзнае шоу настольнага тэніса, і ўсе сапраўдныя прыхільнікі гэтага віду спорту ацэняць майстэрства спартсменаў».
«Гуляць у Еўропе еўрапейцам усё ж крыху прасцей, — лічыць наймацнейшы беларускі тэнісіст Уладзімір Самсонаў. — Азіяцкім спартсменам прыйшлося даволі доўга дабірацца да нас, адбіваецца і розніца ў часе. Спадзяюся, што дамашняя публіка будзе хварэць больш за нас. Хоць не зусім проста гуляць дома, калі штосьці не атрымліваецца. Мы вельмі хочам выйграць, але ў любым выпадку, думаю, гледачы атрымаюць задавальненне».
Каментары