Беларускі фрыстайліст Максім Гусцік заняў 2-е месца на этапе Кубка свету па акрабатыцы
23-гадовы беларускі фрыстайліст Максім Гусцік стаў сярэбраным прызёрам этапу Кубка свету па акрабатыцы, які прайшоў у аўстрыйскім Крайшбергу.
У суперфінальнай чацвёрцы Гусцік атрымаў ацэнку 117,73 бала, уступіўшы менш як адно ачко пераможцу амерыканцу Скоці Баркі (118,59). "Бронза" дасталася яшчэ аднаму прадстаўніку ЗША Дылану Фергюсону (97,35).
Для беларуса гэта выступленне з'яўляецца найлепшым у кар'еры. Раней яго самым высокім дасягненнем на этапах Кубка свету было 4-е месца.
У лік 12 фіналістаў на этапе ў Крайшбергу выйшлі яшчэ два беларусы, аднак у суперфінал яны не прайшлі. Антон Кушнір заняў 7-е месца (98,01), Дзмітрый Дашчынскі — 8-е (97,57). Чацвёрты прадстаўнік Беларусі Дзяніс Осіпаў завяршыў спаборніцтвы пасля кваліфікацыі і заняў апошняе 18-е месца (80,57).
У жаночых спаборніцтвах 19-гадовая беларуска Ганна Гуськова паказала 5-ты вынік сярод 13 удзельніц (82,05).
У агульным заліку Кубка свету па акрабатыцы ў мужчын наперадзе канадзец Аліўе Рашон (404 балы), кітаец Цзя Цаньян (336) і швейцарац Томас Ламберт (288). Гусцік (212) — 8-мы, Кушнір (166) — 13-ты, Дашчынскі (146) — 14-ты, Осіпаў (98) — 19-ты. У жанчын у агульным заліку лідзіруе кітаянка Сю Ментао (480 балаў). Гуськова (169) — на 12-м месцы.
Наступны этап Кубка свету пройдзе 25 лютага ў беларускіх Раўбічах.
Каментары