У панядзелак 26 лістапада кантралёр Людміла Шахліна працавала на маршруце гарадcкога аўтобуса № 2 Наваполацка і пацярпела ад пасажыра, які, як ён лічыць, заступіўся за «зайцоў».
«Ці часта здараюцца падобныя канфлікты з пасажырамі?» — пытаюся ў Людмілы Іосіфаўны.
Людміла Шахліна: «Розныя сустракаюцца. Канфліктаў, вядома, менш, чым нармальнага стаўлення, бо прыстойных людзей больш. Але як толькі нецьвярозы пасажыр, дык — так, канфлікт магчымы».
«Ці ёсьць дні, калі канфліктаў здараецца больш?»
Людміла Шахліна: «Звычайна ў пятніцу, у другую змену, напярэдадні выходных».
«Як можа кантралёр абараніцца ад агрэсіўных пасажыраў?»
Людміла Шахліна: «Ніяк. Мы зусім не абароненыя. Толькі калі выклікаюць нарад міліцыі, а да таго — ніяк».
«Ці выплачваюць вам на працы нейкія кампенсацыі пасля падобных інцыдэнтаў?»
Людміла Шахліна: «Нічога».
«Хаця б у выглядзе прэмій?»
Людміла Шахліна: «Нічога, абсалютна нічога».
«А збольшага праца кантралёра — добра аплочваецца ці не?»
Людміла Шахліна: «Гэтага я вам не скажу. Прабачце, я вельмі занятая».
«Віцебскаблаўтатранс» пра напад на кантралёра: «У нас і ў Віцебску такое бывала»
Супрацоўнік «Віцебскаблаўтатранса» на ўмовах ананімнасці пракаментаваў сітуацыю з агрэсіяй пасажыраў адносна кантралёраў, захадамі бяспекі адносна кантралёраў і стаўленнем да іхнай працы грамадзянаў.
«Мы, „Віцебскаўтатранс“ з’яўляемся адкрытым акцыянерным таварыствам, але амаль увесь пакет акцый знаходзіцца ў Міністэрства транспарту. А паводле Кодэкса аб адміністрацыйных правапарушэннях толькі работнікі дзяржаўных устаноў маюць права складаць пратаколы аб адміністрацыйных парушэннях. У выніку ў нас рукі звязаныя. Кантралёр можа прыняць пэўныя меры альбо адносна кандуктара, які не прадаў квітка, альбо кіроўцы, калі той узяў грошы, а квіток не выдаў. А адносна „зайца“ кантралёр нічога не можа, акрамя як патрабаваць аплаціць штраф. Патрабуе, а тыя нам пішуць скаргі ў адказ, скардзяцца на грубасць. А што да выпадкаў хуліганства, як у Наваполацку, з гэтым потым разбіраецца міліцыя. Такое ў нас і ў Віцебску бывала».
«А як абараніцца кантралёру ад агрэсіі пасажыраў?»
«Як абараніцца? Можа, грамадскую думку падключыць? Калі б пасажыры пачалі абурацца, што мы аплацілі праезд, а ты — не. Магчыма, гэтак? Але ўжываць сілу ў адказ мы ніяк не рэкамендуем, нават забараняем гэта рабіць».
«Але грамадcкая думка не заўсёды на баку кантралёраў. Вось падчас гэтага інцыдэнту ў Наваполацку амаль ніхто не заступіўся за кантралёра».
«Так, бывае і такое».
«У вас дэфіцыт кантралёраў ці іх працуе дастаткова?»
«У нас дэфіцыт усяго: кіроўцаў, кандуктараў, кантралёраў. У краіне ўвогуле вельмі нізкая кампенсацыя затрат на гарадскія і прыгарадныя перавозкі. Таму мы не можам утрымліваць вялікі штат кантралёраў, тым больш калі яны фактычна нічога не могуць зрабіць супроць «зайца».
Паводле суразмоўцы, кантралёр у Віцебскай вобласці зарабляе ад 2 да 2,5 мільёна рублёў.
Паводле звестак з агенцтва продажу квіткоў «Мінсктранс», льготай на бясплатны праезд у гарадскім транспарце карыстаюцца вучні, калі яны едуць да навучальнай установы і назад, а таксама ветэраны Айчыннай вайны і ваенных канфліктаў. Міліцыянты і вайскоўцы льготамі на гарадскі транспарт не карыстаюцца.
Цяпер чытаюць
Стала вядома імя яшчэ аднаго палкоўніка ДФР, арыштаванага КДБ. Ён расказваў сукамернікам, як яго катавалі12
Каментары