Навіны

НАВІНЫ

Псальмы Рыгоравы

Паэт Рыгор Барадулін і бард Алесь Камоцкі запісалі на студыі «Каўчэг» супольны кампакт-дыск «Псальмы». Кружэлка зьмяшчае каля 20 апрацаваных Барадуліным біблейскіх псальмоў цара Давіда, а пачынаецца дыск зь вершаванай малітвы «Ойча наш…», якую пераклаў і чытае сам паэт. Вокладку дыску аздабляе рэпрадукцыя карціны «Анёл» дачкі Барадуліна, Ілоны.

Юбілей Чорнага

Дзяржаўны музэй гісторыі беларускай літаратуры наладзіў выставу і канфэрэнцыю з нагоды 100-гадовага юбілею Кузьмы Чорнага. У канфэрэнцыі ўзялі ўдзел 35 школьнікаў зь Менскага раёну, якія дасьледуюць творчасьць Чорнага, і ўнук пісьменьніка Мікола Раманоўскі. Найбольш цікавае спавешчаньне зрабіла Кацярына Шашалевіч, якая распавяла пра катаваньні рэпрэсаванага клясыка ў Менскай турме.

Сусьветная — па-беларуску

Калегія Міністэрства адукацыі зацьвердзіла канцэпцыю новага падручніка сусьветнай літаратуры для старэйшых клясаў школы. Ужо з новага навучальнага году сусьветная літаратура будзе выкладацца ў межах абноўленага курсу беларускай літаратуры, а значыць — на беларускай мове. Найбольш увагі ў гэтым курсе надаецца прыгожаму пісьменству нашых суседзяў, а найперш Украіны, якую будуць прадстаўляць 11 пісьменьнікаў.

«Мастацтва» ў Інтэрнэце

Часопіс «Мастацтва» стварыў сваю электронную вэрсію ў сусьветным павучыньні на сэрвэры www.ibamedia.com. На тым самым сэрвэры зьмясьціла свой сайт Нацыянальная бібліятэка, але апошні яшчэ не працуе.

На Сьвятога Патрыка

17 сакавіка ў Лунінцы і ў менскім парку Горкага прайшлі маляўнічыя парады з нагоды Дня Сьвятога Патрыка. На наступны дзень у Доме дружбы адбылася прэзэнтацыя кнігі «Беларусь—Ірляндыя», якую выпусьціў Скарынаўскі цэнтар. У кнізе зьмешчана ўсё, што пісалася ў Беларусі пра Ірляндыю (у тым і нашаніўскія тэксты), і наадварот. Пачынаецца яна са звароту прэзыдэнта Ірляндыі пані Мэры МакЭліс. Вялікая дэлегацыя прадстаўнікоў дабрачынных арганізацыяў і дзеячоў культуры з Ірляндыі наведае таксама Слуцак, Гарадзею, Мазыр і Лунінец. Уклала кнігу і арганізавала прыезд гасьцёў Марыя Міцкевіч, унучка Якуба Коласа.

Юрась Барысевіч

Армяне ў Полацку

13 сакавіка Полацак наведаў Сурэн Аруцюнян, былы першы сакратар кампартыі Арменіі, а цяпер пасол у Беларусі. Ён узяў удзел у адкрыцьці мастацкай выставы мастака Грыгора Данеляна ў полацкім музэі кнігадруку. Грыгор Данелян нарадзіўся ў 1950 годзе ў Тбілісі, але сёмы год жыве ў Менску. Сп.Данелян прыехаў у Полацак з падарункам — графікай па матывах паэзіі Хуана Рамона Хімэнэса. Мастак застаўся працаваць у горадзе на тыдзень.

Алесь Козік