Выбары дэпутатаў у Берасьцейскі абласны савет у Баранавічах сёлета пройдуць як у савецкія часы. Усе сем акругаў бэзальтэрнатыўныя. Усе кандыдаты — вылучэнцы ўладаў. Усе яны спрабуюць таксама патрапіць у мясцовыя саветы.
| Алесь Грыцавец — 1970 г.н., кіраўнік тэрма-гальванічнага ўчастку Баранавіцкага аўтаагрэгатнага заводу, сваяк лётчыка-героя Грыцаўца. |
Сярэдні век кандыдатаў у мясцовыя саветы — 48 гадоў. Самаму маладому — 19 (беспартыйны навучэнец каледжу лёгкай прамысловасьці), найстарэйшаму — 77 гадоў (мэтадыст гарадзкога ўпраўленьня адукацыі, ідзе ад КПБ). Кіраўнікоў, намесьнікаў, камандзіраў часьцей — 16, настаўнікаў — 18 (зь іх 15 дырэктараў школаў, каледжаў, ВНУ), дактароў — 10 (тых, што займаюць кіроўныя пасады, — 8). Ідуць ва ўладу толькі 2 прадпрымальнікі. Таксама абіраюцца ваенкам гораду і цяперашні старшыня гарсавету Ўладзімер Стахноў (гэтыя — безальтэрнатыўна).
Партыі разам здолелі зарэгістраваць 19 чалавек: БНФ — 2, БСДП (НГ) — 7, АГП — 3, ПКБ — 3, КПБ — 4. «Ад АГП ў Баранавічах ішло 6 чалавек, зарэгістравана толькі 3.
| Віктар Карлінскі — 1955 г.н., старшыня ЖСК-38, старшыня баранавіцкай БСДП (НГ). |
Мясцовыя філіі дэмакратычных партый ня здолелі падзяліць акругі. Толькі выпадкова іх кандыдаты не сутыкнуліся. «Пападаньне» адбылося толькі аднойчы — па акрузе №7 ідуць Алесь Кісель ад АГП і старшыня баранавіцкай БСДП (НГ) Віктар Карлінскі. Гэта адно дадае шанцаў трэцяму суперніку, Аляксандру Разумаву, намесьніку дырэктара ЗАТ «Атлянт».
Усе партыйцы маюць у акругах канкурэнтаў. Найбольш прэтэндэнтаў на ўчастку №17 — 4 чалавекі. Менавіта там балятуецца старшыня баранавіцкай Рады БНФ Алесь Грыцавец. Але ён здавацца не зьбіраецца. «Хаджу ад дзьвярэй да дзьвярэй, — кажа Грыцавец. — Людзі злыя на ўладу — за рост квартплаты».
На пратэстныя настроі разьлічваюць усе апазыцыйныя кандыдаты.
Руслан Равяка, Баранавічы
Цяпер чытаюць
Жалезная заслона ў дзеянні: як зменшылася колькасць перасячэнняў мяжы Беларусі і Еўрасаюза за апошнія гады18
Каментары