Čamu ŭsio bolš žančyn ciapier nosiać doŭhija vałasy?

Usio čaściej na publicy, u navinach i na čyrvonych darožkach my bačym žančyn z doŭhimi, raskošnymi vałasami. I ŭ palitycy taksama — chacia biełaruskija top-čynoŭnicy hetu modu jašče nie pieraniali.

Demi Mur na premjery filma «Tyhr», u jakim byli pradstaŭleny vobrazy z novaj kalekcyi Gucci. Fota: Luca Bruno / AP Photo

Jak zaŭvažaje viadučaja ahladalnica mody The New York Times Vanessa Frydman, zdajecca, što my ciapier žyviom u epochu Rapuncel — kazačnaj hieraini, znakamitaj svaimi nievierahodna doŭhimi vałasami.

Tak, na premjery novaha filma Gucci zorkaj viečara stała Demi Mur — ikona stylu ź jaje znakamitymi doŭhimi ciomnymi pasmami. Raniej padčas aficyjnaha vizitu ŭ Brytaniju i Miełanija Tramp, i Ketryn, pryncesa Uelskaja, źjavilisia na dziaržaŭnym bankiecie z raspuščanymi kaštanavymi vałasami.

Pryncesa Uelskaja Ketryn i prezident ZŠA Donald Tramp padčas dziaržaŭnaha bankietu ŭ Vindzarskim zamku. 17 vieraśnia 2025 hoda. Fota: Yui Mok — WPA Pool / Getty Images

Doŭhija vałasy stali vizitnaj kartkaj dla mnohich žančyn u zachodniaj palitycy, naprykład, dla Kryści Noem ci Łary Tramp. A dla Mišel Abamy jany pieratvarylisia ŭ sapraŭdnuju dekłaracyju niezaležnaści: paśla Biełaha doma jana źmianiła strohaje kare na efiektnyja kosy, što simvalizavała novy, bolš svabodny etap u jaje žyćci.

Mišel Abama. 9 žniŭnia 2025 hoda. Fota: Arturo Holmes / Getty Images

Heta davoli vialiki zruch u paraŭnańni z tymi časami, kali, jak kaža Linda Uełs, zasnavalnica ŭpłyvovaha časopisa pra pryhažość Allure, «žančynam kazali, što čym starejšymi jany stanoviacca, tym karaciejšymi pavinny być ich vałasy». Jana akcentuje ŭvahu na tym, što Miełanija Tramp stała pieršaj za doŭhi čas pieršaj łedzi, čyje vałasy nižejšyja za plečy.

Miełanija Tramp. 18 vieraśnia 2025 hoda. Fota: Yui Mok — WPA Pool / Getty Images

Siarod biełaruskich top-čynoŭnic takoj mody pakul nie nazirajecca. Vice-premjerka Natalla Piatkievič i namieśnica kiraŭnika Administracyi Łukašenki Volha Čuprys nosiać kare.

Natalla Piatkievič. Fota: sb.by

Staršynia Savieta Respubliki Natalla Kačanava — daŭžyniu da pleč, pres-sakratarka Natalla Ejsmant — da pleč ci krychu daŭžejšuju.

Natalla Ejsmant. Fota: Maxim Shemetov Pool Photo via AP

Ministarka pracy Iryna Kaścievič i kiraŭnica Biełstata Ina Miadźviedzieva — ź niaźmiennymi karotkimi stryžkami.

Kare nosić i lidarka demakratyčnych sił Śviatłana Cichanoŭskaja.

Śviatłana Cichanoŭskaja. Fota: Marek Antoni Iwanczuk NurPhoto via Getty Images

Vałasy — heta bolš, čym prosta vałasy

Reč u tym, što vałasy nikoli nie byvajuć prosta vałasami. Jany — schovišča kulturnych ujaŭleńniaŭ pra hiendar, status, rasu i ŭzrost. Tamu siońniašniaja moda — heta nie tolki bjuci-trend, ale i adlustravańnie hłabalnych zruchaŭ u našych pohladach.

«Doŭhija vałasy majuć hłybokuju historyju i asacyjujucca z mnostvam kodaŭ — relihijnych, kontrkulturnych i kłasična žanockich», — tłumačyć stylist Dafi, jaki stvaraje vobrazy dla podyumnych pakazaŭ takich damoŭ mody, jak Chanel, Celine i Alaïa.

U jeŭrapiejskaj tradycyi doŭhija vałasy stahodździami ličylisia simvałam maładości, dziavoctva i fiertylnaści. Tamu stryžka abo akuratna sabranaja pryčoska byli nie prosta modaj. Heta byŭ vizualny znak taho, što žančyna pastaleła i pryniała svaju novuju sacyjalnuju rolu z usimi jaje praviłami i abaviazkami.

Adnak u pačatku XX stahodździa stryžka nabyła zusim novy sens. Jana stała simvałam sučasnaści, bo mienavita tady źjaŭleńnie sałonaŭ pryhažości zrabiła stylnyja stryžki dastupnymi dla ŭsich.

I naadvarot, kali ŭžo karotkija i akuratnyja pryčoski sami stali normaj u siaredzinie XX stahodździa, majatnik chisnuŭsia ŭ inšy bok. Doŭhija, svabodna raspuščanyja vałasy znoŭ pieratvarylisia ŭ simvał buntu, ale ŭžo suprać novaha, kansiervatyŭnaha isteblišmientu. Heta jaskrava pakazała kontrkultura 1960‑ch.

Novyja pryčyny staroj mody

Siońnia, pa słovach Lindy Uełs, papularnaść doŭhich vałasoŭ tłumačycca niekalkimi novymi fienomienami.

Doŭhija vałasy — heta svajho rodu demanstracyja dabrabytu. «Jany patrabujuć dobraha zdaroŭja i peŭnych hrošaj, kab padtrymlivać ich blask i pyšnaść», — adznačaje Uełs. Niekatoryja stylisty navat nazyvajuć hety trend «vałasy bahataj dziaŭčyny» (rich girl's hair).

Hety aśpiekt uzmacniajecca z uzrostam. Harmanalnyja źmieny, asabliva paśla mienapaŭzy, časta pryvodziać da taho, što vałasy stanoviacca bolš suchimi i tonkimi. Raniej karotkaja stryžka była łahičnym sposabam vyrašyć hetuju bijałahičnuju prablemu.

Siońnia novyja srodki dazvalajuć abyjści hetuju prablemu — znoŭ ža, dla tych, chto moža sabie heta dazvolić. U apošnija hady stali papularnymi bijadabaŭki dla rostu vałasoŭ, a taksama raznastajnyja syrovatki, maski i šmatstupiennyja pracedury pa dohladzie. 

Choć navukovych dokazaŭ efiektyŭnaści hetych srodkaŭ brakuje, ich papularnaść śviedčyć pra toje, što popyt na takija pradukty vielizarny.

Akramia taho, nielha ihnaravać pavarot da bolš tradycyjnych ujaŭleńniaŭ ab žanockaści, dzie doŭhija vałasy źjaŭlajucca klučavym elemientam.

Kamientary da artykuła