Aŭtadafe dla hultajoŭ

Frojda na słužbu sacyjalnaj palitycy dziaržavy!

Feljeton Lolika Uškina.

Časopis «Kareja» apisaŭ, jak pavažany kiraŭnik tavaryš Kim Čen Ir adnojčy zaruliŭ na repetycyju arkiestru. Muzyki rychtavali vykanańnie niejkaha tvoru, i «huki niekalkich dziasiatkaŭ instrumentaŭ, abjadnaŭšysia ŭ adnu melodyju, nahadvali to raźjušanuju buru, to žurčańnie čystaj raki». «Niešta hučyć nia tak», — prakamentavaŭ sejšn pavažany melaman. Paśla jon spytaŭsia ŭ dyryžera, ci nie zaŭvažyŭ toj pamyłki. Paŭnočnakarejski Finberh byŭ zasmučany. Miarkuju, jon niachiła źlakaŭsia: schałturyć pry Samim! Heta ž usio roŭna jak kali b Saładucha, adkryvajučy «Słavianski bazar», zabyŭsia na słovy «Zdravstvuj, čužaja-miłaja» i zaśpiavaŭ «My vyjdziem ščylnymi radami».

Adnak vierniemsia na karejskuju paŭvyspu. Kim Čen Ir, uśmichajučysia, pakazaŭ na adnaho z muzykantaŭ i paprasiŭ łabucha jašče raz nacisnuć na klavišy. Padčas projhryšu navat hieroi stužki «Kraina hłuchich» zaŭvažyli b pamyłku na paŭtonu. «Pamyłka na paŭtonu», — źbiantežana pryznaŭ dyryžer, adnak, jak piša časopis, «u dušy jon byŭ začaravany niezvyčajnaj dakładnaściu muzykalnaha słychu pavažanaha kiraŭnika, jaki ŭ takim składanym tvory ŭ adzin momant zaŭvažyŭ roźnicu na paŭtonu, jakoj by nie zaŭvažyli navat specyjalisty».

Nia mienšaje začaravańnie, čym karejski dyryžer, ja atrymaŭ, nazirajučy apošniuju tusoŭku pa prablemach žyllova-kamunalnaha sektaru. Padčas vystupleńnia Jon vydaŭ sentencyju: «Hultajoŭ bolš karmić nia budziem». I adrazu z dakładnaściu da adnaho adsotka davioŭ, kolki takich antysacyjalnych elementaŭ infiltravałasia ŭ halinu ŽKH, kab ssać chalaŭnyja biudžetnyja soki, — kožny čaćviorty supracoŭnik u stalicy i kožny treci — na peryferyi.

Chutka im prapišuć pucioŭku u centry zaniataści.

Jak? Za košt čaho? Jakimi srodkami možna było tak arytmetyčna juvelirna, z chibnaściu ŭ 1%, dyferencyjavać aniołaŭ ad kazłoŭ, pracaholikaŭ ad dziatłaŭ, jakim pa stanie psychiki ŭ łamiešnik svoječasova i kvalifikavana akazvać pasłuhi nasielnictvu?

Ja bałdzieju!

Ale ŭsie ž, kab nie było lamantu radyjohałasoŭ, byccam by my skacilisia da ŭschodnich satrapij, było b zručna ŭzmacnić ahučanyja ličby statystyčnymi danymi.

Chucieńka pravieści ŭ kožnaj kantory ŽKH psychalahičny test na antypracoŭnuju alerhiju.

Sabrać kalektyŭ, rastusavać jaho na frojdaŭskich dyvančykach i spytać: «Jaki asacyjatyŭny rad vyklikaje ŭ vas słova «praca»?» «Praca, kamanda, adkaznaść, paradak, stabilnaść, prezydent, pravasłaŭje, słavianstva», — skaža naš čałaviek. «Praca, chałtura, chabar, harełka, rassłabon, demakratyja», — manaloh hultaja. Abo, naprykład, zapytacca ŭ taho ž santechnika Piatra, što jamu śniłasia siońnia ŭnačy. Kali Marfej demanstravaŭ jamu kurort na Kanarach, dzie jon žraŭ dvajny burbon i zalacaŭsia da Nikol Kidman, hnać u šyju. Kali spaŭ i bačyŭ, byccam u dołbi-system, jak karačycca na subotniku, budujučy šklanku nacbiblijateki, pakinuć Piatra ŭ štacie.

Ja ŭpeŭnieny: vyniki testu nia prosta paćvierdziać hienij lidera, ale i prademanstrujuć jaho sacyjalny humanizm. Nasamreč hultajoŭ u nas kudy bolej. Pa vynikach psychazandažu možna budzie zvolnić 28% pracaŭnikoŭ ŽKH u stalicy i 36% u Białyničach.

• 0
• 0
• 0
• 0
• 0
• 0
• 0
• 0