Frensisu Buchholcu byŭ 71 hod. Jak paviedamili členy jaho siamji 22 studzienia ŭ sacyjalnych sietkach, jon doŭhi čas zmahaŭsia z ankałahičnym zachvorvańniem, jakoje i stała pryčynaj śmierci.
Frensis Buchholc naradziŭsia 19 lutaha 1954 hoda ŭ Hanoviery i byŭ adnym z klučavych udzielnikaŭ Scorpions u pieryjad najbolšaha roskvitu hurta — z 1973 pa 1992 hod. Za hety čas jon udzielničaŭ u zapisie dziesiaci studyjnych albomaŭ, u tym liku takich znakavych, jak Lovedrive, Blackout, Love at First Sting i Crazy World. Mienavita tady źjavilisia chity, što prynieśli hurtu suśvietnuju słavu.
Dakładnyja pryčyny sychodu Frensisa Buchholca z kalektyvu paśla vychadu Crazy World zastajucca nieviadomymi. Siarod mahčymych viersij nazyvajuć jak žadańnie bolš času pryśviacić siamji, tak i finansavaje roznahałośsie.
Niahledziačy na raźvitańnie sa Scorpions, Buchholc nie pakinuŭ muzyku: jon čas ad času vychodziŭ na scenu, supracoŭničaŭ z byłymi kalehami i ŭdzielničaŭ u kancertnych turach i zapisach inšych prajektaŭ, u tym liku kalektyvu Temple of Rock.
Hurt Scorpions, zasnavany ŭ 1965 hodzie, staŭ adnym z samych paśpiachovych u historyi rok-muzyki, pradaŭšy bolš za 100 miljonaŭ albomaŭ i vystupiŭšy z tysiačami kancertaŭ pa ŭsim śviecie. Asablivuju viadomaść va Uschodniaj Jeŭropie atrymała ich pieśnia Wind of Change, jakaja stała simvałam epochi pieramien.
Kamientary