Apytańnie «NN» na vulicach Miensku: jakim pavinien być kandydat u prezydenty ad apazycyi?
Volha, supracoŭnica dziaržaŭnaj ustanovy:
— Mužčyna ci žančyna — absalutna ŭsio roŭna. Uzrost — 45—50 hadoŭ, 55 —
u krajnim vypadku. Pažadana, čałaviek z vyšejšaj adukacyjaj (ale nie histaryčnaj), možna — ź dźv́juma. Najlepš — ekanamist, jaki maje vialiki staž pracy na dziaržaŭnym pradpryjemstvie. Nie ateist. Kandydat pavinien być siamiejny čałaviek, ni ŭ jakim vypadku nie raźviedzieny. Razumny, intelihientny, sympatyčny, kab viedaŭ nia mienš jak dźvie zamiežnyja movy. Ad Łukašenki jaho budzie vyhadna adroźnivać vychavanaść.
Jaŭhien, čaćviortakurśnik BDU:
— Kandydat ad narodu pavinien być pierš za ŭsio adkaznym. Jon pavinien prytrymlivacca tych pohladaŭ, jakija padzialajuć jaho sajuźniki, demakratyčnyja krainy — pierš za ŭsio Polšča. Vektar pavinien źmianicca na Zachad.
Alena, supracoŭnica administracyi adnaho z bujnych mienskich zavodaŭ:
— Intelihientny, małady, nie biurakrat savieckich časoŭ. Moža być, biznesmen. Žančyna. Bo kolki mužyki ni kiravali, ni ad adnaho niama tołku. Ad Łukašenki jana budzie adroźnivacca rozumam. Jana pavinna być intelihientnaj, umieć dobra pramaŭlać i kiravać. Julija Cimašenka z vyhladu i Marharet Tetčer pa rozumie!
Siarhiej Nadziuk, student BDU:
— Čałaviek va ŭzroście da 40 hadoŭ, maralna stały. Kab išoŭ u nahu z časam.
Valery, aśpirant:
— Pierš za ŭsio mužčyna. Kab umieŭ pryhoža havaryć. Uzrost — nia bolšy za piaćdziasiat. Pažadana z nacyjanalnymi pohladami. Biełaruskamoŭnaść pavinna jaho adroźnivać ad inšych kandydataŭ.
Vital, inžyner pryvatnaj kanstruktarskaj firmy:
— Nie atłuścieły, nia toj, jaki ŭsio žyćcio partfel ciahaŭ. Kab byŭ stały mužčyna, jaki ŭžo skłaŭsia, adbyŭsia, siamiejny, kab šmat čaho damohsia ŭ žyćci, kab prezydenctva stała viancom karjery. Kab mieŭ dobryja suviazi z usim śvietam.
Taciana, aśpirantka:
— Piśmienny, kab umieŭ pravilna razmaŭlać, pavažliva hutaryć z apanentami.
Antoś, student, rodam sa Słonimu:
— Heta pavinien być čałaviek z narodu, kab viedaŭ prablemy, jakija turbujuć narod. Čałaviek, jaki zmoža pavieści za saboju, jon pavinien trymać słova. Heta pavinien być čałaviek ź intelihiencyi.
Jania, studentka, rodam z Brasłava:
— Kab byŭ ščyry i vyklikaŭ davier. Hety čałaviek nie pavinien curacca rodnaj movy, jak heta robić bolšaść palitykaŭ. Jon abaviazkova pavinien razmaŭlać pa-biełarusku. Być čałaviekam, u lubym vypadku.
Andrej, biespracoŭny:
— Ja addam svoj hołas za čałavieka, jaki skaža: «Ja pieramahu Łukašenku!»
U apytańni «NN» najpierš źviartałasia da ludziej maładych — tych, chto ruchaje źmienami. Adčuvajecca, što absalutnaja bolšaść hetych ludziej užo dumali pra toje, na karyść kaho chacieli b zrabić vybar. Jany achvotna dzielacca dumkami nakont hetaha. Na pytańnie karespandenta, zadadzienaje pa-biełarusku, bolšaść ź ich adkazvali na rodnaj movie. Ale akramia movy ŭ adkazach možna znajści šmat inšych padabienstvaŭ.
Čałaviek, za jakoha apytanyja addaduć svaje hałasy, pavinien być dla ich blizkim i zrazumiełym — u procivahu niaŭciamnaj rytorycy apazycyjnych prahram. Jon musić być kulturnym — u procivahu chamstvu ŭłady. Pakul ludzi nie hatovy nazvać imia kandydata svajoj mary — jany jašče navat nia viedajuć imionaŭ, ź jakich možna vybirać. Jany najčaściej kažuć pra kandydata, karystajučysia mužčynskim rodam, ale pryniali b i kandydata-žančynu. Vybarščyki bačać pierad saboj dastatkova maładoha (kala piacidziesiaci) palityka, vydatna adukavanaha prafesijanała, dobraha siemjanina. Taho, kamu jany buduć daviarać. Taho, chto budzie razmaŭlać ź imi na ich movie.
«Pieraapranuŭsia ŭ amapaŭca i dyryžyravaŭ čornaj dubinkaj». Adzin z zasnavalnikaŭ «Volnaha choru» — pra akcyi ŭ handlovych centrach u 2020‑m i pracu ŭ fiłarmonii ŭ Litvie

Kamientary