Nadzvyčajnaje ŭ Maładziečnie: na miasakambinacie Čyža ŭciečka amijaku, evakuacyja
Pa stanie na 15.15 uciečka była likvidavanaja.
Siońnia, 7 śniežnia, kala 11.30 u redakcyju «Rehiainalnaj haziety» patelefanavała žančyna i paviedamiła, što z terytoryi miasakambinata adčuvajecca niepryjemny pach amijaku.
Pa słovach načalnika adździeła pa nadzvyčajnych situacyjach Viačasłava Hrynia,
zdaryłasia ŭciečka paroŭ amijaku ź niavykarystanaha abstalavańnia.
Zaraz na miescy zdareńnia vyratavalniki likvidujuć nastupstvy.
U redakcyju patelefanavała vidavočca zdareńnia Maryna Šupieńka, jakaja raskazała, što, kali prachodziła mima miasakambinata, pačuła niepryjemny rezki pach amijaku, ad jakoha hradam palilisia ślozy i pačaŭsia kašal.
Ludziej, jakija znachodzilisia na pradpryjemstvie, adrazu pačali evakujavać. Pačali evakujavać i navat tych, čyje pradpryjemstvy znachodzilisia pablizu.Vulica Haradockaja dla prajezdu zakrytaja.
Pa infarmacyi MNS,
z terytoryi pradpryjemstva byli špitalizavanyja niekalki mašynistaŭ, jakija ŭvajšli ŭ budynak chaładzilnaj kamiery, adkul i čuŭsia pach amijaku. Jany atrymali lohkaje chimičnaje atručvańnie.
Udakładniajecca, što ŭsiaho špitalizavanyja čatyry čałavieki. Adzin ź ich zajšoŭ u kamieru i ŭbačyŭ, što ź vientyla na trubapravodzie adbyvajecca ŭciečka. Mužčyna pasprabavaŭ zakryć vientyl, ale nie zdoleŭ.
Vyratavalniki zapeŭnivajuć, što pahrozy žycharam horada niama.
Na miesy zdareńnia pracujuć pradstaŭniki centra hihijeny i epidemijałohii, Maładziečanskaja rajonnaja kamisija pa nadzvyčajnych situacyjach.
Pryčyny zdareńnia vyśviatlajucca.
Admietna, što kambinat naležyć kampanii «Trajpł-Vieles», uładalnikam jakoj źjaŭlajecca adzin z bahaciejšych biełarusaŭ Juryj Čyž.
Na pradpryjemstvie ŭ 2009-m była praviedziena madernizacyja technałahičnych pracesaŭ i rekanstrukcyja budynka.
Letaś, 21 maja, u Maładziečnie zdarałasia ŭciečka amijaku z chaładzilnaj ustanoŭki masłasyrbazy. Tady čatyry rabotniki byli špitalizavanyja z atručvańniem.
Kamientary