Partyja BNF maje namier uziać paŭnavartasny ŭdzieł u kampanii pa vybarach deputataŭ miascovych savietaŭ, jakija projduć nie paźniej za 23 sakavika 2014 hoda, kab «pakazać hramadstvu prahramnuju i piersanalnuju alternatyvu ciapierašnim uładam»,havorycca ŭ rašeńni, pryniatym 6 krasavika na pasiadžeńni sojma partyi ŭ Minsku. Pry hetym udzieł u miascovych vybarach Partyja BNF razhladaje ŭ jakaści čarhovaha etapu padrychtoŭki da prezidenckich vybaraŭ 2015 hoda.
Pavodle słoŭ staršyni Partyi BNF Alaksieja Janukieviča, vopyt udziełu ŭ papiarednich kampanijach pa vybary deputataŭ miascovych savietaŭ i Pałaty pradstaŭnikoŭ śviedčyć, što ŭ siońniašnich umovach vybary ŭ Biełarusi nie mohuć ličycca svabodnymi i spraviadlivymi.
U toj ža čas, miarkuje sojm,
udzieł u vybarach ujaŭlaje lehitymnuju mahčymaść dla praviadzieńnia sustreč z vybarščykami, što možna vykarystać u jakaści elemienta kampanii pa vyznačeńni adzinaha kandydata ad demakratyčnych sił na prezidenckich vybarach 2015 hoda.
Na miascovych vybarach Partyja BNF budzie imknucca jak maha šyrej vykarystoŭvać mahčymaści pa vyłučeńni svaich pradstaŭnikoŭ u vybarčyja kamisii roznych uzroŭniaŭ, a taksama praciahvać pracu pa praviadzieńni łakalnych i ahulnanacyjanalnych kampanij u abaronu intaresaŭ hramadzian Biełarusi.
«Vybary zdolnyja stać kampanijaj, u jakoj my možam pakazać nasielnictvu naš patencyjał i prapanovy», —ličyć Janukievič. Jon taksama adznačyŭ, što «jość peŭnaja vierahodnaść, što miascovyja vybary mohuć adbycca ŭ studzieni 2014 hoda, a data ich praviadzieńnia — pryznačana ŭ kastryčniku hetaha hoda».
Kamientary