U Baranavičach były vučań źbiŭ svajho nastaŭnika prosta ŭ škole
Pierad hetym jon raśpivaŭ piva ź siabrami na školnym stałyjonie i pravakavaŭ fizruka.
Z padazreńniem na pierałom pieranośsia i niekalkich rebraŭ 38-hadovaha vykładčyka špitalizavali, piša «Intex-press».
Ciapier jon znachodzicca pad nahladam lekaraŭ i prachodzić miedycynskaje abśledavańnie.
«Ja prachodziła mima pa kalidory, kali pačuła kryki dziaciej. Spačatku navat nie zrazumieła, što zdaryłasia: mnie zdałosia, što heta staršakłaśniki sčapilisia ŭ bojcy. Tolki kali ŭbačyła kalehu, što lažyć na padłozie ŭ łužynie kryvi i darosłaha chłopca pobač ź im, zakryčała na maładoha čałavieka, kab papiaredzić čarhovy ŭdar»,— raskazała «IP» adna z nastaŭnic škoły, jakaja stała śviedkaj zdareńnia.
Incydent adbyŭsia 15 maja prykładna ŭ 9 hadzin ranicy ŭ adnoj sa škoł horada.
Pa słovach adnoj z nastaŭnic, kali nastaŭnik vychodziŭ z kabinieta, raptam z-za kałony vybieh chłopiec i ŭdaryŭ mužčynu kułakom u tvar. Kali vykładčyk ŭpaŭ na padłohu, małady čałaviek pačaŭ źbivać jaho nahami.
Śviedkami zdareńnia stali dzieci, mnohich ź jakich toje, što zdaryłasia mocna ŭzrušyła i napałochała. «U adnoj dziaŭčynki navat zdaryłasia isteryka, — raspaviali ŭ škole. — Jaje supakoili, jak mahli i adpuścili dadomu. Usio, što zdaryłasia, u mianie prosta ŭ hałavie nie ŭkładvajecca. Ja ŭžo bolš za 18 hadoŭ pracuju ŭ škole, ale ničoha navat padobnaha na heta nikoli nie było».
Litaralna za paŭhadziny da zdareńnia chłopca razam z dvuma siabrami bačyli na stadyjonie hetaj ža škoły. «Jany pili piva, a potym pačali pravakavać na bojku vykładčyka fizkultury, — kaža nastaŭnica.— Ale, mabyć, ich napałochała prysutnaść staršakłaśnikaŭ, jakija ŭ toj momant tam zajmalisia i mahli dać adpor».
Paźniej chłopiec pryjšoŭ u škołu. Supracoŭnicy, jakaja ŭ toj momant dziažuryła ŭ kalidory, jon skazaŭ, što budzie čakać svajho małodšaha brata, jaki vučycca ŭ hetaj ža škole, kab addać jamu klučy.
Jak vyśvietliłasia, chłopiec sam kaliści byŭ vučniem hetaj škoły. Źbity im nastaŭnik vykładaŭ u jaho ruskuju movu i litaraturu, a ciapier vučyć jaho małodšaha brata.«Jon vučyŭsia ŭ mianie tolki z 5 pa 7 kłas. Jon byŭ nie vielmi paśpiachovym vučniem, ale niejkich asablivych prablem z pavodzinami nie było, — paviedamiŭ u telefonnaj razmovie z karespandentam «IP» nastaŭnik. — Nie mahu zrazumieć, za što jon napaŭ na mianie: ja nikoli ŭ niejkim niehatyŭnym sensie nie vyłučaŭ jaho z kłasa».
Paśla zdareńnia vykładčyk admoviŭsia ad špitalizacyi i pajšoŭ dadomu, ale ŭžo ŭviečary jamu ŭsio ž taki pryjšłosia źviarnucca pa dapamohu da miedykaŭ, pakolki jon staŭ adčuvać siabie vielmi drenna.
Napadnik ź miesca zdareńnia ŭciok.
Ciapier čytajuć
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ18
Kamientary