Mnohija pacyjenty źviartajucca da roznych bijadabavak i preparataŭ u nadziei palepšyć stan aporna-ruchalnaha aparata, adnak miedycynski pohlad na ich dziejsnaść časta adroźnivajecca ad rekłamnych abiacańniaŭ. Doktar Uładzimir Pikirenia raskazaŭ pra miechanizmy dziejańnia papularnych srodkaŭ dla sustavaŭ i patłumačyŭ, čamu ich pryjom moža nie prynieści čakanaj karyści.
Ci karysnyja dla sustavaŭ chandraicin i hijałuronavaja kisłata
Chandraicin i hijałuronavaja kisłata — najbolš raskručanyja rečyvy ŭ halinie lačeńnia sustavaŭ. Z navukovaha punktu hledžańnia abodva jany adnosiacca da hlikahazaminahlikanaŭ — hrupy doŭhich vuhlavodaŭ (policukrydaŭ).
Jak adznačaje Pikirenia, navat pa svaim miechaniźmie hetyja rečyvy prosta nie mohuć prynosić jakoha-niebudź efiektu pry pryjomie ŭnutr. Sprava ŭ tym, što policukrydy, traplajučy ŭ straŭnikava-kišačny trakt, raspadajucca na bolš karotkija składniki — alihacukrydy, dycukrydy i monacukrydy. U vyniku ŭ kroŭ jany traplajuć u vyhladzie zvyčajnaj hlukozy i dalej vykarystoŭvajucca arhanizmam na ŭłasnyja patreby: pabudovu tłuščavaj tkanki abo ŭ jakaści krynicy enierhii.
Ekśpiert davodzić, što ŭsie kałoryi, atrymanyja čałaviekam ad źjedzienaj hijałuronavaj kisłaty i chandraicinu, iduć prosta na zabieśpiačeńnie žyćciadziejnaści. Nijakaha śpiecyfičnaha ŭpłyvu na sustavy, źmianšeńnie bolu ci palapšeńnie jakaści skury pry hetym nie adbyvajecca.
Dla atrymańnia efiektu hijałuronavaja kisłata pavinna być uviedziena praź filery ci injekcyi niepasredna pad skuru. U jakaści prykładu doktar pryvodzić hieparyn — rečyva z toj samaj hrupy i z padobnym miechanizmam dziejańnia. Jon pryznačajecca dla źmianšeńnia trombaŭtvareńnia, ale nikoli nie ŭžyvajecca ŭ vyhladzie tabletak, a tolki ŭ injekcyjach, pakolki inakš jon nie dziejničaje.
Ci karysnyja dla sustavaŭ kałahieny
Jašče adnym viadomym srodkam, na jaki źviartaje ŭvahu śpiecyjalist, źjaŭlajecca kałahien. Heta białok, jaki składaje prykładna 20—30% ad masy cieła čałavieka i ŭ vialikaj kolkaści źmiaščajecca ŭ miasnych praduktach.
Jak adznačaje Pikirenia, u pracesie stravavańnia pad uździejańniem straŭnikavaha soku i fiermientaŭ padstraŭnikavaj załozy kałahien, jak i luby inšy białok, raspadajecca na aminakisłoty. Adpaviedna, toj kałahien, jaki čałaviek spažyvaje ŭ vyhladzie dabavak, nijakim čynam nie moža ŭ niaźmiennym vyhladzie trapić u sustavy ci skuru.
«Takaja samaja karyść budzie ad źjedzienych kapsuł z kałahienam jak ad salcisonu», — adznačaje Pikirenia.
Bolš za toje, kala 30% aminakisłot u składzie kałahiena prypadaje na hlicyn. Pa słovach doktara, zamiest kupli darahich preparataŭ možna prosta źjeści śvinyja vušy, salcison ci navat zvyčajnuju kurynuju hrudku. U 100 hramach kurynaj hrudki ŭtrymlivajecca istotna bolš hlicynu, čym u cełaj upakoŭcy aptečnaha preparatu.
Ci karysny dla sustavaŭ ałfłutop
Preparat pad nazvaj «Ałfłutop» pradajecca jak rastvor dla injekcyj niepasredna ŭ sustavy. Ekśpiert źviartaje ŭvahu na skład leku: 90% vady i 10% bulonu z drobnych ryb, takich jak šproty i ančoŭsy.
Jak davodzić Pikirenia, faktyčna pacyjentam prapanujecca ŭvodzić u sustaŭ «adfiltravanuju jušku», što naŭrad ci moža dapamahčy pry bolach.
Jon padkreślivaje, što nijakich daśledavańniaŭ — ni mižnarodnych, ni jakasnych miascovych — jakija b paćviardžali efiektyŭnaść hetaha srodku, nie isnuje. «Sustaŭ — heta miesca, dzie nie pavinna być bakteryj, paškodžańniaŭ i hetak dalej. A kali robicca injekcyja — heta zaŭsiody ryzyka dadatkovych paškodžańniaŭ. Tamu heta toje, što dakładna nielha sprabavać pry prablemach z sustavami», — adznačaje ekśpiert.
Što sapraŭdy dapamahaje sustavam?
Zamiest marnavańnia hrošaj na fufłamicyny, doktar rekamienduje zasiarodzicca na realnych mietadach prafiłaktyki i padtrymki.
1. Aktyŭny ład žyćcia i pravilnyja nahruzki. Dla sustavaŭ karysnyja ruchi biez mocnaha treńnia i viertykalnaj kampresii. Idealny varyjant — basiejn. Płavańnie zabiaśpiečvaje aktyŭny ruch, palapšaje kryvatok, ale pry hetym pavierchni sustavaŭ nie ściskajucca i nie trucca adna ab adnu pad ciažaram cieła.
2. Narmalizacyja vahi. Lišniaja vaha stvaraje kałasalnuju nahruzku na kaleni, tazaściehnavyja sustavy i chrybiet. Nijakija bijadabaŭki nie zmohuć kampiensavać fizičnaje razbureńnie sustavaŭ pad zališniaj masaj.
3. Admova ad kureńnia, jakoje niehatyŭna ŭpłyvaje na sasudy i krovazvarot, što naŭprost paharšaje charčavańnie sustaŭnaj tkanki.
Prytrymlivańnie hetych prostych praviłaŭ pryniasie vašamu arhanizmu značna bolš karyści, čym lubyja modnyja preparaty.
Dabaŭki z kałahienam stali papularnyja ŭ žančyn. Ale ci pracujuć jany? Voś što pakazvajuć daśledavańni
«Ludzi iduć u miačeci, a nie lečać psichičnyja chvaroby». Biełaruski psichijatr raskazaŭ ab pracy va Uźbiekistanie i ŭ Polščy
Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary
Vo vsiom raźbirajetsia.
Kruto!