Praces pa spravie Hajdukova adnovicca 27 červienia

Sudovy praces nad abvinavačanym u zdradzie dziaržavie Andrejem Hajdukovym praciahniecca 27 červienia ŭ Viciebskim abłasnym sudzie. Pasiadžeńnie pa-raniejšamu budzie prachodzić u zakrytym režymie, paviedamiŭ BiełaPAN pravaabaronca Pavieł Levinaŭ.

Apošniaje pasiadžeńnie adbyłosia 21 červienia. Pavodle infarmacyi Levinava, sud pa-raniejšamu vyvučaŭ dokazy, sprečki bakoŭ nie pačalisia.

«Nakolki mnie viadoma, maci Hajdukova ŭžo vystupała ŭ sudzie ŭ jakaści śviedki na minułym tydni, — skazaŭ pravaabaronca. — Ź jaje ŭziali padpisku ab nievydavańni. Z adnaho boku, jana baicca štości havaryć, kab nie naškodzić synu, i heta zrazumieła. Z druhoha — jana adznačyła, što z tych pytańniaŭ, jakija joj zadavalisia, jana nie moža zrazumieć, za što sudziać jaje syna».

Levinaŭ taksama paviedamiŭ, što atrymaŭ adkaz ad viadučaj praces sudździ Haliny Urbanovič na svoj zvarot z patrabavańniem źmianić mieru strymańnia Hajdukovu. «Jana napisała, što ŭ mianie niama paŭnamoctvaŭ źviartacca da sudździ z takim patrabavańniem, — skazaŭ Levinaŭ. — Akramia taho, mnie adkazaŭ staršynia Viciebskaha abłasnoha suda Mikałaj Chamičonak, jakomu ja nakiroŭvaŭ manitorynh sudovaha pracesu nad Hajdukovym, dzie ŭkazvaŭ na dapuščanyja parušeńni pravoŭ Hajdukova. Chamičonak paviedamiŭ, što zakanadaŭstvam Biełarusi nie praduhledžana praviadzieńnie manitorynhaŭ kryminalnych pracesaŭ, tamu maje materyjały jon viartaje nazad. Ja čakaŭ inšaj reakcyi».

Nahadajem, 23-hadovy Andrej Hajdukoŭ, apieratar navapołackaha NPZ «Naftan», lidar niezarehistravanaha hramadskaha abjadnańnia «Sajuz maładych intelektuałaŭ», byŭ zatrymany 8 listapada 2012 hoda. Pavodle viersii śledstva, «u momant zakładki tajnika sa źviestkami, što cikaviać zamiežnyja śpiecsłužby». Paśla zatrymańnia jaho pieraviali ŭ śledčy izalatar KDB u Minsk. Potym maładoha čałavieka nieadnarazova pieravozili ź Minska ŭ Viciebsk i nazad. Pa art. 356 Kryminalnaha kodeksa (zdrada dziaržavie ŭ formie praviadzieńnia ahienturnaj dziejnaści) Hajdukovu pahražaje ad 7 da 15 hadoŭ pazbaŭleńnia voli.

Na dumku pradstaŭnikoŭ apazicyi i pravaabaroncaŭ, pryčynaj zatrymańnia Hajdukova stała jaho aktyŭnaja hramadskaja dziejnaść. Napiaredadni pačatku pracesu pravaabaroncy i pradstaŭniki hramadskaści źviartalisia da ŭład z prośbaj zrabić sudovy praces adkrytym, adnak ich prośba nie była pačutaja.

19 červienia kiraŭnik KDB Valeryj Vakulčyk zajaviŭ žurnalistam, što Hajdukovu abvinavačańnie moža być pierakvalifikavana na inšy artykuł. «Nie fakt, što Hajdukoŭ pojdzie pa 356-m artykule», — skazaŭ jon.

Vakulčyk zapeŭniŭ pradstaŭnikoŭ ŚMI, što paśla vyniasieńnia rašeńnia suda jany atrymajuć usiu nieabchodnuju infarmacyju ab pracesie, za vyklučeńniem «zakrytych pytańniaŭ». «Terminy vyniasieńnia rašeńnia budzie vyrašać sud. U mianie niama sumnieńniaŭ, što ŭsio budzie abjektyŭna», — zajaviŭ jon.

• 0
• 0
• 0
• 0
• 0
• 0
• 0
• 0