Prafsajuzny aktyvist Leanid Dubanosaŭ padaŭ u sud na «Hranit»

U sudzie Łuninieckaha rajona pačaŭsia razhlad spravy ab adnaŭleńni na pracy aktyvista Biełaruskaha niezaležnaha prafsajuzu na pradpryjemstvie «Hranit».

Jak paviedamiŭ charter97.org lidar miascovaj jačejki BNP Aleh Stachajevič, jaho kaleha Leanid Dubanosaŭ nie zhodny sa svaim zvalnieńniem z raźmieščanaha ŭ Mikaševičach RUVP «Hranit», pakolki miarkuje, što ź im nie praciahnuli pracoŭny kantrakt vyklučna ŭ suviazi ź dziejnaściu ŭ niezaležnym prafsajuznym ruchu. Faktyčna Dubanosava zvolnili za toje, što jon praihnaravaŭ nastojlivyja patrabavańni administracyi spynić pieralik uznosaŭ na rachunak prafsajuznaj arhanizacyi praz buchhałteryju pradpryjemstva.

Kantrakt ź Leanidam Dubanosavym, jaki pracavaŭ na «Hranicie» pamočnikam mašynista ekskavatara, pavinny byli padoŭžyć 16 traŭnia, adnak u toj čas jon znachodziŭsia ŭ adpačynku. Kali ž Dubanosaŭ vyjšaŭ na pracu, jaho nie dapuścili na pradpryjemstva achoŭniki, paviedamiŭšy ab zvalnieńni.

U svajoj sudovaj poźvie pracoŭny «Hranitu» patrabuje nie tolki adnaŭleńnia na pracy, ale i spynieńnia dyskryminacyi pavodle prafsajuznaj prykmiety. Akramia taho Dubanosaŭ adznačaje, što, pavodle kalektyŭnaj damovy, administracyja pradpryjemstva pavinna vypłacić jamu materyjalnuju dapamohu da adpačynku, čaho zroblena nie było (pradstaŭnik adkazčyka śćviardžaŭ u sudzie, što zajavy na dapamohu Leanid nibyta nie pisaŭ).

Pavodle słoŭ Aleha Stachajeviča sudu taksama byli pradstaŭleny vytrymki z kalektyŭnaj damovy, zhodna ź jakoj z rabotnikami pradpryjemstva, jakija majuć vysokuju kvalifikacyju i staž, a taksama nie atrymlivali dyscyplinarnych spahnańniaŭ na praciahu hoda, kantrakt praciahvajecca aŭtamatyčna na termin nie mienš za piać hadoŭ.

Bolš za toje, u sudovym pasiadžeńni vyśvietliłasia, što paviedamleńnie ab zvalnieńni było adpraŭlena na adras, pa jakim Dubanosaŭ nie pražyvaje, a pad samim paviedamleńniem staić nie jaho podpis, a inšaha čałavieka (pazoŭnik prapanavaŭ paraŭnać jaho aŭtohraf, pastaŭleny na inšych dakumientach). Sud pryniaŭ pastanovu vyklikać u jakaści śviedki paštaljona ź Mikaševičaŭ, kab vyśvietlić, ci było dastaŭlena pracoŭnamu hetaje apaviaščeńnie. Nastupnaje pasiadžeńnie projdzie 23 lipienia.

Nahadajem, što ŭ kancy 2011-ha hoda 600 rabočych pradpryjemstva «Hranit», raźmieščanaha ŭ Mikaševičach, zajavili ab vychadzie ź dziejučaj na pradpryjemstvie aficyjnaj prafsajuznaj arhanizacyi i majuć namier stvaryć alternatyŭnuju pieršasnuju strukturu Biełaruskaha niezaležnaha prafsajuza.

Z momantu stvareńnia supołki niezaležnaha prafsajuzu na RUP «Hranit» byli zvolnienyja samyja aktyŭnyja siabry niezaležnaha prafsajuza - Aleh Stachajevič, Mikałaj Karyšaŭ i jaho žonka Marharyta, Hienadź Paŭłoŭski, Vital Pašečka, Ludmiła i Anatol Litvinka.

• 0
• 0
• 0
• 0
• 0
• 0
• 0
• 0