Ekśpiert: U budučyni mahčymy rost staŭki refinansavańnia
Takuju dumku vykazaŭ finansavy analityk aficyjnaha partniora «Alpary» ŭ Minsku Vadzim Iosub 15 lipienia padčas videabryfinhu.
Ekśpiert adznačyŭ, što apošnimi tydniami nazirajecca niekatoraje ŭzmacnieńnie žorstkaści hrašova-kredytnaj palityki.
"Pracesy, jakija my nazirajem apošnim časam, śviedčać pra niekatoraje ŭzmacnieńnie žorstkaści hrašova-kredytnaj palityki Nacbankam.Siudy možna adnieści i pavieličeńnie normy reziervavańnia pa valutnych układach (pavieličeńnie adličeńniaŭ u fond abaviazkovych reziervaŭ. — BiełaPAN.), i pavieličeńnie normy reziervavańnia pry vydačy valutnych kredytaŭ na najaŭnyja patreby", — skazaŭ Iosub.
Nacbank zaŭsiody padkreślivaŭ, nahadvaje ekśpiert, što hrašova-kredytnaja palityka budzie zaležać ad pracesaŭ u ekanomicy. "U pieršaj pałovie hoda źnižałasia staŭka refinansavańnia, heta značyć adbyvałasia asłableńnie hrašova-kredytnaj palityki. Ale paśla kožnaha z takich zachadaŭ Nacbank uvažliva naziraŭ za reakcyjaj ekanomiki", — adznačyŭ Iosub.
U červieni, kanstatavaŭ ekśpiert, na finansavym rynku Biełarusi stali vyjaŭlacca niehatyŭnyja tendencyi."U pryvatnaści, abjom kupli valuty pieravysiŭ abjom prapanovy, akreśliŭsia pieraciok rublovych układaŭ u valutnyja. Mienavita ŭ adkaz na ŭsie hetyja pracesy Nacbank nie pajšoŭ u lipieni na dalejšaje źmiakčeńnie (źnižeńnie staŭki refinansavańnia. — BiełaPAN.) hrašova-kredytnaj palityki", — pierakanany Vadzim Iosub.
Jon vykazaŭ mierkavańnie, što ŭ budučyni mahčymy rost staŭki refinansavańnia. "Nielha vyklučać rostu staŭki refinansavańnia dla zachavańnia ahulnaj stabilnaści ŭ ekanomicy", — skazaŭ Iosub.
Nahadajem, Nacyjanalny bank na praciahu sakavika—červienia hetaha hoda źniziŭ staŭku refinansavańnia z 30 da 23,5%, a ŭ lipieni admoviŭsia źmianiać ulikovuju staŭku. "Siezonnaje pavyšeńnie popytu na zamiežnuju valutu z boku nasielnictva vyznačaje metazhodnaść zachavańnia žorstkaści hrašova-kredytnaj palityki, uklučajučy dziejny ŭzrovień pracentnych stavak u ekanomicy", — arhumientavaŭ Nacbank niaźmiennaść staŭki refinansavańnia.
Tym časam bankiry, apytanyja BiełaPAN, miarkujuć, što Nacbank nie pajšoŭ u lipieni na źnižeńnie staŭki refinansavańnia, bo aścierahajecca dałaryzacyi ŭkładaŭ. U vypadku kali ŭ trecim kvartale budzie adbyvacca praces dałaryzacyi ŭkładaŭ, mahčyma navat pavyšeńnie staŭki refinansavańnia, ličać bankiry.
Vosieńniu minułaha hoda ŭ Biełarusi na fonie źnižeńnia pracentnych stavak i rostu devalvacyjnych čakańniaŭ układčyki stali pieravodzić rublovyja ŭkłady ŭ valutnyja depazity. U suviazi z hetym Nacbank u trecim kvartale 2012 hoda spyniŭ praces źnižeńnia staŭki refinansavańnia.
U bankaŭskaj sistemie Biełarusi vosieńniu 2012 hoda naziraŭsia deficyt rublovaj likvidnaści, z-za čaho banki pavyšali pracentnyja staŭki pa ŭkładach, što spryjała rostu pryvabnaści rublovych depazitaŭ.
U sakaviku 2013 hoda Nacbank adnaviŭ praces źnižeńnia staŭki refinansavańnia, u vyniku čaho dachodnaść pa rublovych depazitach znoŭ stała źnižacca.Z druhoj pałovy červienia 2013 hoda ŭ Biełarusi adbyvajecca rost kursu dołara, što jašče bolš źnižaje pryvabnaść rublovych źbieražeńniaŭ.
Ciapier čytajuć
U Minsku pieradumali znosić chruščoŭki. Renavacyja zakranie dvuch-trochpaviarchovyja damy1
Kamientary