Ale dom na kołach pakul nie pastupiŭ u prodaž. A što cikavaha ŭnutry?
Niadaŭna pradpryjemstva «MAZ-Kupava» prezientavała aŭtadom «Kupava-273140». Partał av.by daviedaŭsia bolš pra hetu navinku.
Namieśnik hienieralnaha dyrektara pa vytvorčaści i ideałahičnaj pracy TAA «MAZ-Kupava» Uładzimir Anańjeŭ kaža, što aŭtadom — pradukt dla ich nie novy. Naprykład, jany vypuskali aŭtadom «Ekskluziŭ» i pryčep «Kupava-822002».
Kab zrabić ciapierašni aŭtadom, sabrali niekalki fokus-hrup, kab zrazumieć, što sapraŭdy patrebna rynku.
«U fokus-hrupy ŭvajšli ludzi va ŭzroście ad 15 da 50 hadoŭ: supracoŭniki pradpryjemstva, błohiery, padletki, zaŭziatyja padarožniki ź Biełarusi i blizkaha zamiežža. Nas cikaviła, što ludzi chočuć bačyć u aŭtadomie, a ad čaho hatovyja admovicca».
Asnovaj aŭtadoma stała šasi MAZ-365, u narodzie viadomaje jak «hałavaścik».
«U jaho jość šerah važnych pieravah. Pa-pieršaje, masa aŭtamabila — da 3,5 tony, a značyć, dla kiravańnia dastatkova katehoryi B. Pry hetym zavod zakłaŭ hruzavuju deltu da 4,2 tony, što daje dadatkovuju karysnuju nahruzku. Pa-druhoje, 6‑stupieńčataja MKPP zabiaśpiečvaje lepšuju manieŭranaść».
Pad kapotam aŭtadoma ŭstalavany ruchavik JAC HFC4DE1-1D. Heta dyzielny radny mator kłasa «Jeŭra-5» abjomam 2,7 ł i mahutnaściu 150 k. s. Raschod paliva ŭ darozie składaje 11 litraŭ na 100 km.
Pry ŭklučeńni zadniaj pieradačy aktyvujecca sistema kruhavoha ahladu z kamieraj 360°, dziakujučy jakoj možna bačyć nie tolki prastoru za aŭtamabilem, ale i zonu pa bakach u dyjapazonie 0,5 mietra ad aŭtadoma.
Taksama biełaruski aŭtadom abstalavany kruiz-kantrolem, kandycyjanieram, pavietranym i niezaležnym aciaplalnikami, elektrahazavym bojleram, elektraškłopadjomnikami i sistemaj «razumny dom» (adnak na paneli kiravańnia niama biełaruskaj ci ruskaj movy).
Praces raspracoŭki aŭtadoma «Kupava-273140» zaniaŭ hod. Jaho stvarała kamanda maładych supracoŭnikaŭ (im usim da 35 hadoŭ).
Cana pakul nieviadomaja.
«U prodaž mašyna jašče nie pastupiła, zaraz my prachodzim siertyfikacyju. Košt bazavaj kamplektacyi budzie viadomy pa zaviaršeńni hetaha etapu. Spadziajemsia, zmožam zrabić heta ŭžo zusim chutka. Mahu vas zapeŭnić: cana budzie ŭ miežach rynkavaj!» — kaža Uładzimir Anańjeŭ.
Partał av.by vykazvaje zdahadku, što košt «Kupava-273140» budzie ŭ miežach 200 tysiač rubloŭ.
Jak raspavioŭ Uładzimir Anańjeŭ, popyt na biełaruski aŭtadom užo anamalna vysoki.
«Za pieršyja dźvie hadziny paśla pieršaj publikacyi da nas pastupiła bolš za 200 zvankoŭ. I ich kolkaść nie źmianšajecca. Niekatoryja ŭžo navat pryjazdžali asabista pahutaryć i pahladzieć na navinku na svaje vočy. Zrazumieła, usich cikaviać košt i finansavyja instrumienty, z dapamohaj jakich možna nabyć aŭtadom».
Pry zamovie aŭtadoma možna budzie vybrać abklejku na svoj hust.
Taksama ŭ aŭtadomie majecca skrazny bahažnik. A ŭnutry pakupnikoŭ čakajuć manhał, kazan, składanyja kresły, tent i navat nastolnaja hulnia.
Unutry — dastatkova prastory, azdableńnie i mebla z ekaskury ŭ śvietłych tanach, panaramnyja vokny. Aŭtadom raźličany na siamju z čatyroch čałaviek.
Nasuprać vannaha pakojčyku raźmieščana kuchnia. Hazavaja plita na čatyry kanforki, vysoŭny stoł dla hatavańnia, rakavina. Kuchnia całkam abstalavana posudam, stałovymi pryborami i nieabchodnym kuchonnym načyńniem.
Jość niekalki razietak la padhałoŭja, razdymy USB i Type-C, ruchomyja lampy dla čytańnia ŭ ciomny čas sutak. Paścielnaja bializna dla spalnych miescaŭ taksama ŭvachodzić u kamplekt.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary