Navalny: davajcie bieź iluzijaŭ. Siarhiej Navumčyk adkazvaje Alesiu Čajčycu

U svaich natatkach Aleś Čajčyc u značnaj stupieni debatuje z maim artykułam «Drobiazi Navalnaha» (Aleś i sam napisaŭ mnie pra namier ustupić ŭ dyskusiju). Dyskusija — reč karysnaja, aŭtar u svaim tekście vykazvaje cikavyja zaŭvahi (tym bolš kaštoŭnyja, što jon žyvie ŭ Maskvie i bačyć rasiejskuju sytuacyju znutry), ale, na žal, u hałoŭnym jon nie pierakanaŭ: u adsutnaści ŭ vykazvańniach Navalnaha niebiaśpieki dla Biełarusi.

Možna było b nie nadzialać hetulki ŭvahi asobie Navalnaha (zrazumieła, što meram Maskvy jon nie abiarecca), ale historyja vučyć, što ŭ Rasiei ŭsio mahčyma. Kali ŭ 1987 hodzie Harbačoŭ paniziŭ Jelcyna da pasady ministra, heta aznačała palityčnuju śmierć: u stabilnaj kamunistyčnaj systemie čałaviek, vyviedzieny z Palitbiuro, moh ruchacca tolki ŭniz. Nakolki pamiataju, nichto nie prahnazavaŭ u 87-ym Jelcynu palityčnuju budučyniu. Ale skončyłasia stabilnaść — i Jelcyna vyniesła na pavierchniu. Budzie nafta pa 50 dalaraŭ za barel — i Rasieju mohuć čakać niejmaviernyja palityčnyja kulbity (navat u vypadku, kali Navalnaha pasadziać — čaho, kaniečnie, ja jamu ni ŭ jakim razie nie žadaju).

Ułasna, hałoŭny kontrarhument Čajčyca ŭtrymlivajecca ŭ nastupnych frazach:

«Niama takoha rasiejskaha palityka, jaki b skazaŭ, što jon suprać intehracyi ź Biełaruśsiu i Ŭkrainaj… Što ž tyčycca palityki, adroźnieńnie rasiejskich liberałaŭ ad čekistaŭ-kleptakrataŭ i ad RPC ŭ tym, što ŭ libierałaŭ nie staić zadačy aneksii Biełarusi i źniščeńnia biełaruskaj movy i kultury. Jany za dyjaloh i prynamsi za toje, kab intehracyja adbyvałasia na dobraachvotnaj asnovie (što dla biełarusaŭ razumieje pad saboj mahčymaść ad jaje admovicca)».

Ale davajcie nia ciešyć sabie iluzijami i spadziavańniami, što pad intehracyjaj rasiejskija palityki razumiejuć tolki ekanamičnyja dy kulturnyja ŭzajemasuviazi (zrešty, i sam Navalny skazaŭ pra «adnu dziaržavu»). Pra «dobraachvotnaść» ža «intehracyi» peryjadyčna zajaŭlaje i Pucin — i my viedajem košt hetaj «dobraachvotnaści»,

Toje, što ŭ Rasiei «ŭsie palityki takija», nie pavinna być padstavaj dziela taho, kab zapluščyć vočy na najaŭnaść takoj jakaści ŭ spadara Navalnaha.

Dla biełarusaŭ ci rumynaŭ staŭleńnie prezydenta Biełarusi ci Rumynii da palestynska-izrailskaha kanfliktu — sprava sorak piataja. A voś dla izrailcianaŭ jano całkam vyznačaje ich acenku jak palitykaŭ. Staŭleńnie ž da hetaha prezydenta Iranu (zaraz vyniesiem za dužki stupień samastojnaści iranskaha prezydenta) — dla izrailskich jaŭrejaŭ pytańnie žyćcia i śmierci. Pry hetym zrazumieła, što ŭ bližejšyja dziesiacihodździ naiŭna čakać prychodu ŭ Tehieranie asoby, jakaja b z sympatyjaj staviłasia da jaŭrejaŭ, mohuć być tolki niekatoryja niuansy ŭ padychodach — kštałtu, ciapier bambić ci pačakać. Ale nikomu ŭ Izraili nia pryjdzie ŭ hałavu apantana padtrymlivać palityka, jaki za «pačakać» i bačyć u im ledź nie vyratavalnika; pa vyznačeńni heta — apanent (kali nia vorah).

Ja zusim nie chaču bačyć u kožnym rasiejskim palityku voraha Biełarusi.

Ale zastajecca faktam, što tolki niekalki dzion adčuvali my adsutnaść prajavaŭ imperskaści ŭ kiraŭnikoŭ Rasiei (z 21 pa 30 žniŭnia 1991 hodu, kali pres-sakratar Jelcyna zreahavaŭ na abviaščeńnie Ukrainaj i Biełaruśsiu niezaležnaści zajavaj pra pierahlad miežaŭ) — i heta byli ci nia samyja plonnyja dla biełaruskaj dziaržaŭnaści dni — kali Maskva nia lezła ŭ našyja spravy.

Dyk voś, staŭleńnie maskoŭskaha palityka da isnavańnia Biełarusi jak dziaržavy — dla nas, biełarusaŭ, pavinna być klučavym. Usie astatnija jakaści — potym.

I ŭ sytuacyi vakoł Navalnaha turbuje jakraz nia sam Navalny, a pamknieńnie davoli značnaj častki palityčna aktyŭnaha biełaruskaha hramadztva apryjory pahadzicca ź imperskim nastrojem ciapierašniaha favaryta rasiejskaj apazycyi, daravać jamu hetyja nastroi.

U 1999 hodzie niekatoryja maje siabry, u demakratyźmie jakich niama padstavaŭ sumniavacca, hetak adkazvali na maje zaściarohi adnosna Pucina jak patencyjna niebiaśpiečnaha dla biełaruskaj dziaržaŭnaści palityka. «Pucinu dastajecca ŭščent raźbitaja kraina, z kryminałam, razburanaj ekanomikaj, tut pracy na dvaccać hadoŭ, dy ŭ jaho prosta času nia budzie «źbirać ruskija ziemli», — kazali adny. «Pucin — pradstaŭnik novaha pakaleńnia, prahmatyk, zdolny ŭsprymać liberalnyja idei, urešcie, jon viedaje jak minimum adnu zamiežnuju movu i jamu nieabyjakava, što skažuć pra jaho na Zachadzie» — supakojvali inšyja.

Čas daŭ acenku takim tłumačeńniam.

Jašče niekalki dzion tamu ja kazaŭ — pytańni da Navalnaha zdymajucca, kali jon skaža, što vykazaŭsia jon, jak piša Aleś Čajčyc, z pryčyny «nieznajomaści z sapraŭdnaj Biełaruśsiu», i što jon ličyć nieparušnym biełaruski (i ŭkrainski, i ŭsialaki inšy) suverenitet. Ale jahonyja apošnija interviju raźviejali takija spadziavańni.

«Dyk što Vy chočacie, — skažuć mnie, — i nia budzie Navalny tak kazać. Bo zajavić takoje — aznačaje adšturchnuć ad sabie vializnuju častku elektaratu, bo vy ž viedajecie nastroi rasiejcaŭ».

U takim razie — dzie harantyja, što zrabiŭšysia prezydentam, Navalny nia budzie rabić kroki na šlachu aneksii Biełarusi (palityčnaj ci ekanamičnaj), kali heta budzie adpaviadać nastrojam rasiejskaha hramadztva?

I jašče (užo pa-za miežami arhumentacyi Alesia Čajčyca) — ździŭlaje imknieńnie niekatorych pastavić Navalnaha ŭ prykład biełaruskim aktyvistam — maŭlaŭ, voś u kaho pavučyciesia! Nu, vučycca zaŭsiody karysna, ale hety prykład nie zusim spraviadlivy. Rasiejskija apazycyjnyja palityki dziejničali i dziejničajuć ŭ nieparaŭnalna lepšych i źniešnich, i ŭnutranych umovach — pačynajučy z kanca 80-ych hadoŭ. Što da Navalnaha, dyk jahonyja baćki mieli i majuć dobry biznes, sam jon maje biznes, siadzić (va ŭsialakim razie, jašče niadaŭna) ŭ dobrym ofisie ŭ Maskvie. U Biełarusi ŭžo šmat hadoŭ tych, chto zmahacca z režymam, vykidajuć z pracy, nia kažučy ŭžo pra biznes ci pra ofisy. Narešcie, padziei ŭ Rasiei tradycyjna robiacca pradmietam pieršačarhovaj cikaŭnaści Vašynhtonu, Bruselu i, što nia mienš važna — viadučych zachodnich ŚMI; u hetym sensie rasiejskija viadučyja apazycyjanery nieparaŭnalna ŭ bolšaj stupieni «mižnarodna abaronienyja». Heta zusim nie paprok ŭ ich adras — heta paprok tym, chto sprabuje pastavić ich u prykład biełarusam.

• 0
• 0
• 0
• 0
• 0
• 0
• 0
• 0