Śviatkavańnie 1025-hodździa Chrostu Rusi ŭ Minsku pieratvaryłasia ŭ panižeńnie Biełarusi

Pryznajusia: ja nie chadziŭ na Mienskaje zamčyšča, kab pabačyć pradstajalnikaŭ Pravasłaŭnych Cerkvaŭ i pabyć na Liturhii. I horača, i šmatludna, i, nie vyklučaju, niamała było na ŭračystaści prosta cikaŭnych raziavakaŭ, jakija nie viedajuć ni čynapaśledavańnia, ni kali kłaści na siabie znak kryža, ni dzie trymać ruki, dy jašče zajmajucca rospytami…

Kolki ludziej było na Liturhii? Na sajcie Biełaruskaj Pravasłaŭnaj Carkvy (a dakładniej Biełaruskaha Ekzarchatu RPC) ja pračytaŭ: tysiačy čałaviek.

Čytańnie aficyjnych sajtaŭ daje mahčymaści dla rozdumu. Na sajcie BPC čytajem, što na miesca ździajśnieńnia Liturhii «prybyli Śviaciejšy Patryjarch Maskoŭski i ŭsiaje Rusi Kirył i Ačolniki pamiesnych Pravasłaŭnych Cerkvaŭ». Što heta, pakłon pierad haspadarom? Jakim by ni byŭ ułada- i słavalubny maskoŭski Patryjarch, jon viedaje, što takoje carkoŭny etykiet i što jon, hałava Maskoŭskaj Carkvy, moža iści i stajać pobač, ale nie pierad Patryjarcham Aleksandryjskim i nie pierad Patryjarcham Jerusalimskim. Darečy, aficyjny sajt RPC pra hetaje šeście nie zaikajecca.

Pieralik tych, chto adpraŭlaŭ Liturhiju, na sajcie RPC i Ekzarchatu taksama adroźnivajecca. Tak, na sajcie RPC u hetym pieraliku nazvany Patryjarch Hruzinski Ilja II, ale na sajcie Ekzarchatu paviedamlajecca, što padčas bahasłužby Ilja II adno maliŭsia, h.zn. nie słužyŭ niepasredna pierad prastołam. I heta zrazumieła: u 80-hadovaha hałavy Hruzinskaj Carkvy ciažkaja chvaroba.

Cikavaje taksama supastaŭleńnie infarmacyi na sajcie RPC i Ukrainskaj Pravasłaŭnaj Carkvy Maskoŭskaha Patryjarchatu (UPC MP). Druhi ź ich, aśviatlajučy Liturhiju 28 červienia ŭ Kijeva-Piačerskaj Łaŭry, paviedamlaje, što razam z pradstajalnikami Aleksandryjskaj, Jerusalimskaj, Rasijskaj, Hruzinskaj, Sierbskaj, Bałharskaj, Kiprskaj, Polskaj i Amierykanskaj pamiesnych Cerkvaŭ słužyli kiraŭniki delehacyjaŭ inšych Cerkvaŭ, ačolniki jakich u Kijeŭ nie pryjechali. Pieršym siarod ich nazvany kiraŭnik delehacyi Kanstancinopalskaj Carkvy mitrapalit Halski Emanuił. A voś na sajcie RPC mitrapalit Emaniuł u pieraliku adsutničaje. Što heta — niedahlad tych, chto rychtavaŭ infarmacyju dla sajtu RPC, ci naŭmysnaje zamoŭčvańnie?

Što pasłaniec Usialenskaha Patryjarcha, mitrapalit Emanuił, nie ŭšanavaŭ svajoj prysutnaściu Miensk, — pra toje možna daviedacca i z sajta RPC, i z sajta Ekzarchatu. Nie pryjechaŭ u Miensk i Nieafit, Patryjarch Bałharski (jon zastaŭsia ŭ Kijevie, tam naviedaŭ duchoŭnuju akademiju, hutaryŭ ź mitrapalitam Uładzimiram). Nie dajechaŭ da Mienska i kiraŭnik delehacyi Rumynskaj Carkvy.

Dy ŭsio ž mienskaje śviatkavańnie ad kijeŭskaha adroźnivałasia nie tym, što adsutničali adzin z patryjarchaŭ i dva kiraŭniki carkoŭnych delehacyjaŭ. Paviedamlajučy pra Liturhiju ŭ Kijeva-Piačerskaj łaŭry, aficyjny sajt u pieraliku pradstajalnikaŭ nazyvaje i mitrapalita Kijeŭskaha i ŭsiaje Ukrainy Uładzimira. Viedama, UPC MP nie aŭtakiefalnaja Carkva, navat nie aŭtanomnaja, ale maje asablivy stutus i kiruje svaimi spravami sama. Paviedamlajučy ž pra Słužbu na Mienskim zamčyščy, aficyjny sajt RPC paśla pieraliku pradstajalnikaŭ i kiraŭnikoŭ delehacyj pamiesnych Cerkvaŭ dadaje: «U liku tych, chto susłužyŭ za Boskaj liturhijaj, byli Patryjaršy Ekzarch usiaje Biełarusi mitrapalit Mienski i Słucki Fiłaret, mitrapalit Krucicki i Kałomienski Juvienalij…»

Karaciej, kiraŭnik Pravasłaŭnaj Carkvy ŭ niezaležnaj dziaržavie Biełaruś pastaŭleny ŭ adzin šerah z namieśnikam maskoŭskaha archireja ŭ Maskoŭskaj vobłaści Rasii.

Samakiravańnie z šyrokaj aŭtanomijaj užo daŭno maje Ukrainskaja Carkva, samakiravańnie majuć carkva ŭ Małdovie i navat mikraskapičnyja Łatvijskaja dy Estonskaja cerkvy. Adna pravasłaŭnaja Biełaruś nie ŭdastoiłasia takoha honaru. I hałava pravasłaŭnaj Biełarusi nazvany ŭ liku niepieršastupiennych haściej, jakija pryjechali na śviatkavańnie 1025-hodździa Chrostu Rusi ŭ Miensk. Takija našy realii.

Anatol Sidarevič

• 0
• 0
• 0
• 0
• 0
• 0
• 0
• 0