Nacbank zapiarečyŭ Śledčamu kamitetu: Niamožna patrabavać pašpart pry apłacie kartkaj

Nacyjanalny bank u svaim paviedamleńni nahadaŭ, što nichto nie moža patrabavać abaviazkova pakazvać pašpart ci inšaje paśviedčańnie asoby pry bieznajaŭnych raźlikovych apieracyjach z bankaŭskimi kartkami.

«Abaviazkovaje patrabavańnie ab pradjaŭleńni trymalnikam kartki dakumienta, jaki paćviardžaje asobu, pry apłacie tavaraŭ (pasłuh) u arhanizacyi handlu (servisu), narmatyŭnymi pravavymi aktami Nacyjanalnaha banka i praviłami płaciežnych sistem nie ŭstanoŭlena», — havorycca ŭ pres-relizie.
Nacbank nahadvaje, što asnoŭnym paćvierdžańniem praviadzieńnia apieracyi źjaŭlajecca podpis klijenta na kvitku ci ŭviadzieńnie PIN-koda.

«U adpaviednaści ź Instrukcyjaj paćviardžeńniem ździajśnieńnia apieracyi pry vykarystańni kartki źjaŭlajecca kart-ček.

Trymalnik kartki, uvodziačy PIN-kod abo padpisvajučy kart-ček, pryznaje pravilnaść nazvanaj u kart-čeku sumy i tym samym daje ŭkazańnie banku na śpisańnie hetaj sumy sa svajho bankaŭskaha rachunku», — tłumačycca ŭ paviedamleńni.
Kasir moža prapanavać pakazać paśviedčańnie asoby tolki ŭ sprečnych vypadkach: kali podpisy na kvitku i kartcy nie supali ci kali kupiec sprabuje raspłacicca kartkaj na čužoje imia.

Taksama Nacbank zasiarodžvaje ŭvahu, što pieradavać svaju kartku dla karystańnia inšaj asobie kateharyčna zabaroniena.

«Trymalnik kartki abaviazany pastavić asabisty podpis na advarotnym baku kartki i zachoŭvać svoj PIN-kod (piersanalny identyfikacyjny numar) ŭ tajamnicy. Pieradača kartki i PIN-koda da jaje treciaj asobie, jaki nie źjaŭlajecca trymalnikam kartki, zabaronienaja. U vypadkach, kali ŭ klijenta ŭźnikaje nieabchodnaść dać prava karystacca hrašovymi srodkami na svaim bankaŭskim rachunku inšaj asobie (naprykład, žoncy, jakaja znachodzicca ŭ adpačynku pa dohladzie za dziciem, abo svajaku, jaki pražyvaje ŭ inšym horadzie), uładalnik rachunku moža aformić u banku-emitenta dadatkovuju kartku na imia dadzienaj asoby. Pry hetym paradak vykarystańnia kartak źjaŭlajecca standartnym dla ŭsich bankaŭ-emitentaŭ», — havorycca ŭ paviedamleńni.

Pres-reliz Nacbanka źjaviŭsia nieŭzabavie paśla niepryjemnaj situacyi ŭ adnym ź minskich univiersamaŭ, dzie kasiry dziela vykanańnia pradstaŭleńnia Śledčaha kamiteta admovilisia absłuhoŭvać klijentaŭ biez paśviedčańniaŭ asoby.

Paśla chvali abureńnia pradstaŭnik Śledčaha kamiteta patłumačyŭ, što administracyja kramy zrabiła pamyłku, bo kasiry nie mieli prava patrabavać paśviedčańni asoby ad usich kupcoŭ.
Śledčy kamitet razasłaŭ aficyjnyja papiery ŭ minskija kramy z nahadkaj kasiram być bolš pilnymi dla prafiłaktyki machlarstva pry raźlikach bankaŭskimi kartkami.

• 0
• 0
• 0
• 0
• 0
• 0
• 0
• 0