Jeŭrakamisar Fiule pra cisk z boku Rasii na krainy Uschodniaha partniorstva

Uvahu Pradstaŭnictva Eŭrapiejskaha źviaza ŭ Biełarusi pryciahnuła Ahienctva navinaŭ Biełaruskaj dziaržaŭnaj teleradyjokampanii ad 13-ha vieraśnia, u jakim pierajnačany źmiest vystupu Kamisara Štefana Fiule na plenarnym pasiedžańni Eŭrapiejskaha parlamenta ŭ Strasburhu 11-ha vieraśnia, u jakim jon zakranuŭ pytańni cisku z boku Rasiei na krainy Ŭschodniaha partnerstva.

Kab paźbiehnuć niekarektnaj interpretacyi i nieparazumieńniaŭ u budučyni, Pradstaŭnictva EZ u Biełarusi raspaŭsiudziła vystup Štefana Fiule. Padajem pierakład na biełaruskuju movu.

Pra cisk z boku Rasiei na krainy Ŭschodniaha partnerstva

Eŭrapiejskaja Kamisija — vystup 13/687

Štefan Fiule, Eŭrapiejski kamisar pa pytańniach pašyreńnia i Eŭrapiejskaj palityki susiedztva

Plenarnaja sesija Eŭrapiejskaha parlamenta ŭ Strasburhu

11 vieraśnia 2013

Spadar staršynia, šanoŭnyja deputaty,

Imkliva nabližajecca samit Uschodniaha partnerstva ŭ Vilni. Jon abiacaje stać histaryčnym krokam napierad u palityčnaj asacyjacyi i ekanamičnaj intehracyi ź niekalkimi z našych uschodnich susiedziaŭ. Vidavočna — i pamyłkova — u niekatorych kołach heta razhladajecca jak pahroza. U vyniku my stali śviedkami vielizarnaha cisku, jaki akazvajecca na niekatorych z našych partneraŭ.

Eŭrapiejski źviaz zaŭsiody vyrazna farmulavaŭ pryncypy svajoj palityki ŭ dačynieńni da svaich uschodnich partneraŭ. Našyja ahulnyja intaresy patrabujuć ad nas supracoŭnictva z našymi susiedziami na ŭschodzie dla ŭstalavańnia prastory roskvitu i stabilnaści na našym kantyniencie.

Šerah pahadnieńniaŭ ab partnerstvie i supracoŭnictvie, padpisanych u siaredzinie dzievianostych, užo praduhledžvali stvareńnie zony svabodnaha handlu. Technika-ekanamičnaja acenka, praviedzienaja ŭ 2004 hodzie, pryviała da taho, što «hłybokija i ŭsioabdymnyja zony svabodnaha handlu» (DCFTA) stali nieadjemnymi častkami «novych pašyranych pahadnieńniaŭ», jakija paśla stali viadomymi jak Pahadnieńni ab asacyjacyi i byli prapanavanyja ŭ 2006 hodzie.

Pieršyja pieramovy ab stvareńni DCFTA pačalisia z Ukrainaj u 2008 hodzie, adrazu paśla taho, jak kraina stała čalcom Suśvietnaj handlovaj arhanizacyi (SHA).

Paśla Eŭrapiejskaja Kamisija ŭ svaim kamiunikie ad 2008 hodu pradstaviła asnoŭnyja pałažeńni toj prapanovy, jakaja była zroblenaja našym uschodnim partneram na samicie ŭ Prazie, dzie byŭ pakładzieny pačatak Uschodniamu partnerstvu ŭ 2009 hodzie i paćvierdžanaja našaja ahulnaja meta — palityčnaja asacyjacyja i ekanamičnaja intehracyja, padmacavanyja damovami ab asacyjacyi i stvareńni DCFTA.

Ad samaha pačatku Eŭrapiejski parlament padtrymlivaje hety padychod, nakiravany na palityčnuju i ekanamičnuju transfarmacyju hetaj častki Eŭropy.

Heta praŭda, što siabroŭstva ŭ Mytnym źviazie niesumiaščalnaje z «hłybokimi i ŭsioabdymnymi zonami svabodnaha handlu», pieramovy ab stvareńni jakich my viadziem z Ukrainaj, Małdovaj, Hruzijaj i Armienijaj.

I heta nie z-za ideałahičnych adroźnieńniaŭ — havorka nie idzie pra sutyknieńnie ekanamičnych blokaŭ abo «hulni z nulavoj sumaj». Heta z-za pravavoj niesumiaščalnaści: u pryvatnaści, nielha adnačasova źnizić mytnyja taryfy zhodna z normami DCFTA i padniać zychodziačy z abaviazalcitvaŭ u miežach siabroŭstva ŭ Mytnym źviazie.

Novaje pakaleńnie pahadnieńniaŭ ab asacyjacyi pradastavić vielizarnyja pieraŭtvaralnyja pieravahi, asabliva z dapamohaj zbližeńnia pravavych i rehulatyŭnych normaŭ, z dapamohaj libieralizacyi rynku. Niezaležnyja daśledavańni pakazvajuć, što DCFTA pryniasie značnyja pieravahi.

Z časam ekspart u EZ moža padvoicca, zabiaśpiečyŭšy pry hetym amal 12-adsotkavy rost VUP. Adnak kab dasiahnuć hetaha, našy partnery pavinny vałodać poŭnym suvierenitetam u farmavańni svajoj handlovaj palityki, u toj čas jak u siabraŭ Mytnaha źviazu jaho nie budzie.

Niama sumnievaŭ, krainy-ŭdzielnicy Ŭschodniaha partnerstva majuć mahčymaść umacoŭvać svajo supracoŭnictva z Mytnym sajuzam, mahčyma ŭ jakaści naziralnikaŭ.

I, viadoma, udzieł u DCFTA całkam sumiaščalny z damovami ab svabodnym handli, jakija dziejničajuć pamiž našymi partnerami i inšymi krainami Sadružnaści niezaležnych dziaržavaŭ (SND).

Dazvolcie skazać ščyra: raźvićcio prajekta Eŭrazijskaha ekanamičnaha źviaza pavinna vykonvać suvierennyja rašeńni našych partneraŭ. Lubyja pahrozy Rasiei, źviazanyja z mahčymym padpisańniem pahadnieńniaŭ z Eŭrapiejskim źviazam źjaŭlajucca nieprymalnymi. Heta tyčycca ŭsich formaŭ cisku, u pryvatnaści takich jak:

— Mahčymaje złoŭžyvańnie pry vystaŭleńni koštaŭ na enierhanośbity;

— Stvareńnie štučnych pieraškodaŭ dla ažyćciaŭleńnia handlu, naprykład, uviadzieńnie sumnieiŭnych z punktu hledžańnia adpaviednaści normam SHA zabaronaŭ na impart, ciažkija mytnyja pracedury;

— Vajennaje supracoŭnictva i harantyi biaśpieki;

— Vykarystańnie zaciažnych kanfliktaŭ.

Heta nie toj šlach, pa jakim pavinna iści raźvićcio mižnarodnych adnosinaŭ na našym kantyniencie ŭ dvaccać pieršym stahodździ. Takija dziejańni vidavočna parušajuć pryncypy, jakija padzialajucca ŭsimi eŭrapiejskimi krainami.

Prymajučy Chielsinskija pryncypy ABSIE, my abaviazalisia pavažać «prava kožnaj krainy vyznačać i budavać svaje adnosiny ź inšymi dziaržavami pavodle svajaho mierkavańnia i pavodle mižnarodnaha prava». Eŭrapiejski źviaz budzie padtrymlivać i vystupać na baku tych, na kaho akazvajecca niepravamocny cisk.

Dazvolcie mnie padkreślić, što Pahadnieńnie ab asacyjacyi i DCFTA nie zadumvalisia na škodu Rasiei. Naadvarot, Rasija atrymaje vialikuju karyść ad intehracyi krainaŭ Uschodniaha partnerstva ŭ ahulnaeŭrapiejskuju ekanomiku.

Našaje bačańnie zaklučajecca ŭ tym, što ŭ doŭhaterminovaj perspektyvie hetyja pahadnieńni pavinnyja paspryjać farmavańniu zasnavanaj na praviłach SHA ahulnaj ekanamičnaj prastory ad Lisabona da Ŭładzivastoka.

Takim čynam, my zaachvočvajem ŭmacavańnie našymi partnerami svaich suviaziaŭ z Rasiejaj — hetaksama, jak ŭmacoŭvajem hetyja suviazi i my, adnak takoje ŭmacavańnie pavinna być sumiaščalnym z abaviazalnictvami ŭ ramkach pahadnieńniaŭ ab asacyjacyi i stvareńni DCFTA.

Eŭrapiejski źviaz hatovy pracavać sa svaimi susiedziami i šukać šlachi da bolšaha narmatyŭnaha zbližeńnia pamiž EZ i siabrami Mytnaha źviaza.

Pratekcyjanisckaja ściana, jakaja padzialiła b naš kantynient na dźvie častki, — heta zusim nia toje, što nam treba. Va ŭmovach siońniašniaj ŭsio bolš kankurentnaj hłabalnaj ekanomiki my nia možam dazvolić sabie marnavać siły na rehijanalnaje hieapalityčnaje supiernictva.

Spadar staršynia, šanoŭnyja deputaty,

Na zakančeńnie ja chacieŭ by zrabić piać zaŭvahaŭ:

1. Niekatoryja z vas zaklikajuć mianie bolš aktyŭna hulać u stratehiju. Hetaha ja rabić nia budu. Inšyja zaklikajuć mianie bolš aktyŭna vystupać za našyja kaštoŭnaści, i mienavita heta maja praca – spryjać supracoŭnictvu z krainami Ŭschodniaha partnerstva na asnovie hetych kaštoŭnaściaŭ.

Ja nie hraju ŭ hulni z nulavoj sumaj, bo ja vieru ŭ mahčymaść biazproihryšnych sytuacyjaŭ, asabliva va ŭzajemadziejańni z takim stratehičnym partneram, jakim źjaŭlajecca Rasieja. Ja nie zajmajusia budaŭnictvam ścienaŭ – akurat naadvarot.

Pieraŭtvareńni – praviła hetaj hulni, i pahadnieńni ab asacyjacyi i stvareńni hłybokich i ŭsioabdymnych zonaŭ svabodnaha handlu – heta samyja mahutnyja instrumenty transfarmacyi.

Voś čamu Vilenski samit i padrychtoŭka da padpisańnia i pačatku realizacyi hetych pahadnieńniaŭ nastolki važnyja. Praviły hulni nie ŭ tym, kab źnižać płanku, nie ŭ tym, kab vystaŭlać umovy, a ŭ tym, kab prapanoŭvać našym partneram bolš stratehičnaje ŭzajemadziejańnie.

2. Nam nieabchodna kazać našym rasiejskim siabram znoŭ i znoŭ, što Ŭschodniaje partnerstva nie skiravanaje suprać ich i ichnich intaresaŭ. My pavinnyja lepš tłumačyć suadnosiny pahadnieńniaŭ ab asacyjacyi i Mytnaha źviaza.

Ja pryniaŭ da viedama paviedamleńni pra toje, što na dumku rasiejskaha premjer-ministra hetym dźvium kancepcyjam nie chapaje sumiaščalnaści. My ŭźniali hetaje pytańnie ŭ jaho prysutnaści ŭ lutym na sumiesnym pasiedžańni Eŭrapiejskaj Kamisii i Urada Rasiei ŭ Maskvie, my ŭzdymali hetaje pytańnie i da lutaha, i my kažam pra jaho taksama ŭ ramkach kaardynacyjnaj hrupy pa pytańniach infarmavańnia, u jakoj Rasieja zajmaje važnaje miesca.

I kožny raz my tłumačym, čamu heta nie tak, padkreślivajučy, što heta nie palityčnaja hulnia, što havorka idzie ab suvierenitecie našych partneraŭ, ab ich źniešniehandlovaj palitycy. I my zaŭsiody dadavali pry hetym, što my pieršyja zacikaŭlenyja ŭ tradycyjnych suviaziach pamiž našymi partnerami i Rasiejaj i što my hatovyja dapamahčy partneram i, u kančatkovym vyniku, Maskvie vyznačyć palityku, jakuju partnery mahli b padzialić ŭ toj miery, u jakoj jana nie supiarečyć pahadnieńniam ab DCFTA.

3. Ja razumieju, što Rasieja razhladaje pryniaćcie normaŭ i standartaŭ EZ jak patencyjna prablemnaje pytańnie, pakolki ciapier jany nie zaŭsiody supadajuć z normami i standartami Mytnaha źviaza. Adnak my ŭžo aktyŭna supracoŭničajem z Rasiejaj pa unifikacyi šmatlikich normaŭ i standartaŭ.

Heta klučavy element Partnerstva dziela madernizacyi pamiž Eŭrapiejskim źviazam i Rasiejaj. I hetyja standarty ŭsio čaściej prymajucca Mytnym źviazam. Normy EZ čaściakom prymajucca na mižnarodnym uzroŭni i, viadoma, całkam sumiaščalnyja z praviłami SHA. Takim čynam EZ na samoj spravie dapamahaje ŭsim partneram, uklučna z Rasiejaj, pravodzić madernizacyju i stanavicca bolš adkrytymi dla hlabalizacyi.

Hetkim ža čynam novaje pahadnieńnie, pavodle jakoha my viadziem pieramovy i jakoje pavinna zamianić saboj Pahadnieńnie ab partnerstvie i supracoŭnictvie pamiž EZ i Rasiejaj, pavinnaje ŭtrymlivać pałažeńni ab bolš ščylnym źbližeńni rehulatyŭnych ramak bakoŭ i takim čynam zabiaśpiečyć stabilnaść i pradkazalnaść jak dla rasiejskich, tak i dla eŭrapiejskich kampanijaŭ.

4. Havoračy pra salidarnaść i adzinstva ŭ halinie handlovaj palityki, adznaču nastupnaje: my pryniali da ŭvahi zabaronu Rasiei na impart sielskahaspadarčaj pradukcyi z Małdovy.

My nie majem dadzienych ni pra jakija pryčyny, źviazanyja z patrabavańniami da biaśpieki praduktaŭ charčavańnia, jakija mahli b abhruntavać hetaje rašeńnie. Słužby EZ, jakija adkazvajuć za biaśpieku praduktaŭ charčavańnia, nie vyjavili nijakich hihijeničnych prablemaŭ abo pahrozaŭ dla zdaroŭja ŭ impartujemych z Małdovy praduktach, i my pa-raniejšamu impartujem vino i inšuju sielskahaspadarčuju pradukcyju.

Razam z maim kaleham Dačyanam Čyjałasam, jaki kuryruje pytańni sielskaj haspadarki, my majem namier vyvučyć mahčymaść pavieličeńnia kvoty na impart vina z Małdovy ŭ EZ.

My taksama majem namier adpravić u Małdovu ekspertaŭ, kab jany dapamahli pieraadoleć niekatoryja ź pieraškodaŭ, ź jakimi sutykajucca inšyja haliny Małdovy (naprykład, ptuškahadoŭla) u ažyćciaŭleńni ekspartu ŭ EZ. Takija prajavy salidarnaści taksama dastasavalnyja da inšych partneraŭ, jakija sutykajucca ź niepravamocnym ciskam.

5. Kali my tolki prystupali da realizacyi Ŭschodniaha partnerstva ŭ Prazie ŭ 2009 hodzie, ideja stvareńnia Eŭrazijskaha źviaza jašče nijak siabie nie prajaviła.

Heta było rašeńnie Rasiei budavać Mytny i Eŭrazijski źviazy, stvarajučy sytuacyju, u jakoj našyja eŭrapiejskija partnery sutykajucca z vybaram pamiž dvuma prajektami rehijanalnaj ekanamičnaj intehracyi. Niemahčyma, kab našyja partnery zrabilisia achviarami niesumiaščalnaści hetych prajektaŭ.

Niemahčyma taksama, kab za samastojna pryniatyja rašeńni našyja partnery mahli być pakaranyja, a ich handlovyja adnosiny ź siabrami Mytnaha źviaza mahli apynucca pad pahrozaj raźvićcia na značna horšych umovach, čym tyja, jakija vyznačanyja ŭ miežach našych ułasnych damoŭlenaściaŭ.

My budziem rabić usio mahčymaje, kab paźbiehnuć takoha scenaru i razam z našymi susiedziami znojdziem šlachi da maksimalnaj sumiaščalnaści pamiž EZ i eŭrazijskimi strukturami takim čynam, kab spryjać ekanamičnaj intehracyi i spraščeńni handlu.

• 0
• 0
• 0
• 0
• 0
• 0
• 0
• 0