Łukašenka pra chakiej: Pakazać śvietu, što Biełaruś — cyvilizavanaja kraina, a nie jak pišuć u ŚMI
Łukašenka zapatrabavaŭ padrychtavać čempijanat śvietu pa chakiei, jaki projdzie ŭ Minsku z 9 pa 25 maja 2014 h., na samym vysokim uzroŭni.
Na hetym jon zajaviŭ na naradzie pa pytańniach padrychtoŭki i praviadzieńnia hetaha spabornictva.
«Patrabuju ad usich zadziejničanych halin maksimalnaj kancentracyi vysiłkaŭ u zaviaršalny pieryjad padrychtoŭki, — padkreśliŭ Łukašenka. My abaviazany prademanstravać usioj suśvietnaj supolnaści vysokuju stupień arhanizacyi čempijanatu śvietu».
Da čempijanatu zastałosia 200 dzion, i Łukašenka zapatrabavaŭ ad udzielnikaŭ mierapryjemstva hruntoŭnyja i padrabiaznyja dakłady pa ŭsich napramkach, jakija zakranajuć praces arhanizacyi čempijanatu.
«Było dastatkova času, kab nie tolki padrychtavacca da ciapierašniaj narady, ale i vyrašyć usie prablemnyja pytańni pa płanie padrychtoŭki. Mnie patrebna vyraznaść i, samaje hałoŭnaje, što nie zroblena i čamu», — skazaŭ Łukašenka.
Pavodle jaho słoŭ, čempijanat śvietu — heta nie prosta spartyŭnaja padzieja: «Heta toj momant, kali my krainu vystavim napakaz ŭsiamu śvietu. I jakaja budzie hetaja kraina, takoje i mierkavańnie składziecca pra jaje va ŭsim śviecie.
Bolš za toje, heta surjoznaje ekanamičnaje mierapryjemstva». Jak miarkuje Łukašenka, čempijanat śvietu «pavinien prynieści surjoznuju ekanamičnuju addaču, finansavuju addaču».
«Tamu čempijanat śvietu 2014 hoda — heta surjoznaja pravierka i ekzamien dla ŭsich struktur, — pierakanany Łukašenka.
— Toje, što my pavinny tvar dziaržavy pakazać, uzmacniajecca i tym, što apošnim časam prablema paŭstała pierad usim śvietam palityzavanaj».
Łukašenka miarkuje, što ludzi buduć jechać nie tolki pahladzieć, jak hulaje lubimaja kamanda, panazirać za hetymi pracesami, ale ŭ ich padspudna, a moža i samym hałoŭnym, budzie pytańnie: što heta za kraina, ź jakoj chtości sprabavaŭ vyklučyć čempijanat śvietu.
Tamu Biełaruś pavinna pakazać usim, što jana sapraŭdy Centralnajeŭrapiejskaja cyvilizavanaja kraina. «Kab ludzi ad nas, jak heta časta byvała, źjazdžali i kazali: heta zusim narmalnaja kraina, horad, a nie toje, što my čytali ŭ srodkach masavaj infarmacyi», - adznačyŭ Łukašenka.
«Naša meta — zrabić tak, kab znachodžańnie haściej u Biełarusi było kamfortnym, a prapanavany servis moh zadavolić samuju patrabavalnuju publiku», — padkreśliŭ jon.
Alaksandr Łukašenka zapatrabavaŭ asablivuju ŭvahu nadać pytańniam biaśpieki ludziej i adpracoŭki ŭzajemadziejańnia ekstranych słužbaŭ. Padzieja pavinna stać dla ŭsich zapaminalnaj i znakavaj dla Minska.
Alaksandr Łukašenka padkreśliŭ, što asnoŭnaje ŭžo zroblena, a ciapier asablivuju ŭvahu treba nadać pytańniach, pa jakich majucca niedapracoŭki:
«Mianie cikavić usio - ad stvareńnia nieabchodnaj spartyŭnaj, transpartnaj i haściničnaj infrastruktury, arhanizacyi pracy vałancioraŭ da padrychtoŭki nacyjanalnaj kamandy da paśpiachovaha vystupleńnia na čempijanacie śvietu. U nas jašče čas jość, šmat što možna darabić, papravić, kali što-to nie tak, jak nam chaciełasia b».
Kamientary