Rok vikinha. Praviły žyćcia futbolnaha voina ź Isłandyi

Na poŭnačy Jeŭropy, dzie vydatnych majstroŭ futboła možna pa palcach pieraličyć, na pieršy płan vychodziać bajcy.

Ich nievierahodnaja addača kaštuje daražej, čym majsterstva technaroŭ, bo roźnica ŭ kłasie pamiž isłandskimi kłubami minimalnaja (kali słova «kłas» naohuł darečy ŭ kantekście surovaha paŭnočnaha futboła [Isłandyja prabiłasia ŭ stykavyja matčy čempijanatu śvietu -- NN]).

Tamu hulcy hatovyja dabivacca tryumfu luboj canoj — smak pracoŭnaj i spraviadlivaj pieramohi nie paraŭnać z najlepšymi miascovymi rybnymi delikatesami. Voś čamu futboł u Isłandyi absalutna ščyry — hulcoŭ cikaviać nie hrošy, a zadavalnieńnie ad pieramoh. Da taho ž, imknieńnie być pieršymi ŭ naščadkaŭ vialikich vikinhaŭ u kryvi.

U takoj miasarubcy prajšła vialikaja častka karjery Aŭshiejra Bierkura Aŭshiejrsana.

Zaraz isłandskamu aporniku 26 hadoŭ — uzrost futbolnaj śpiełaści — ale chaŭbiek ni razu ŭ žyćci nie hulaŭ za zbornuju krainy — ni za maładziožnuju, ni za junijorskuju.

Bolš za toje, Aŭshiejrsan nie ŭmieje zabivać hały jak Ejdur Hudjonsan [znakamity isłandski hulec, vystupaŭ za «Čełsi» ŭ 2000-2006 hh., zatym za «Barsiełonu» ŭ 2006--2009 hh., ciapier hulaje za bielhijski «Bruhie» — NN] abo padkručvać miač jak Hilfi Sihurdsan [zaraz hulec «Totenchiema» — NN], tamu za im nikoli nie sačyli anhlijskija skaŭty. Jaho samaja kaštoŭnaja ŭznaharoda -- bronza, jaho rodny «Filkir» — tolki sieradniak Piepsi-dejłda, vyšejšaj lihi krainy [u sioletnim čempijanacie «Filkir» finišavaŭ na 7-m miescy z 12 kamandaŭ — NN].

Dy i naohuł, jon nie maryŭ pra vialiki sport: chłopiec vučyŭsia ŭ zvyčajnaj isłandskaj škole, fanacieŭ ad łondanskaha «Arsienała», a paśla ŭrokaŭ vyciahvaŭ miełodyi z hitary i naviedvaŭ siekcyju futboła — całkam znajomy raskład dziacinstva, ci nie praŭda?

Sport dla Aŭshiejra spačatku išoŭ na zakusku, bo kłubny futboł u Isłandyi -- nie samy prybytkovy zaniatak: siezon na vostravie doŭžycca paŭhoda, a inšyja paŭhoda hulcy siadziać biez spravy.

Tamu ŭletku isłandziec hulaŭ i treniravaŭsia, a ŭzimku — navučaŭsia va ŭniviersitecie, pracavaŭ mieniedžaram u klininhavaj kampanii i zabaŭlaŭ daškolnikaŭ, pracujučy animataram u dziciačym sadku. Chto b moh padumać, što hety šmathranny chłopiec abiare ŭ vyniku prafiesijny futboł?

Aŭshiejr znajšoŭ svajo paklikańnie nie adrazu — spačatku jaho sprabavali ŭ napadzieńni, ale zatym pieraviali ŭ centr pola i trapili ŭ kropku. U roli chvalareza isłandziec pačuvajecca jak ryba ŭ vadzie — lutaść Aŭshiejrsana pryniesła jamu słavu na ŭsiu krainu.

Nakolki žorstki futbalist na poli, nastolki jon rezki i ŭ vykazvańniach:

«Niachaj Kryścina vyciraje ślozy ŭ prybiralni! [vidać, razmova pra Kryštyjanu Ranałdu — NN] Dla mianie najlepšy hulec — Dženara Hatuza [znakamity futbalist «Miłana» ŭ 1998-2011 hh. — NN], ale ciapier ja aryjentujusia na Chaŭjera Maskierana, Majkła Eśjena, Skota Parkiera i, viadoma, Najdžeła de Jonha [hałandski futbalist — NN]. A takija ludzi, jak Li Katermoł z «Sanderlenda», nikoli b nie dazvolili «Barsiełonie» pakazvać pryhožy futboł».

Apietyt prychodzić padčas ježy — kulminacyjaj karjery Aŭshiejrsana stali hulni z «Tarpieda» Žodzina ŭ Lizie Jeŭropy

[siezon 2010/2011, pieršy adboračny raŭnd Lihi Jeŭropy, biełarusy pieramahli dvojčy — 3:1, 3:0 — NN], paśla čaho chaŭbiek zasiarodziŭsia na futbole. Słava pra dvužylnaha kapitana «Filkira» pieralacieła z vostrava na kantynient, i debiutant narviežskaj Typielihi «Sarpsbarh» arandavaŭ bajca na try miesiacy ŭ sakaviku 2013-ha. Zaprasiŭ Aŭshiejra novy trenier kamandy Brajan Dyn -- eks-forvarda zbornaj Anhlii cikaviŭ typaž macioraha kastałoma, zhubleny na zadvorkach Čempijonšypa ŭ 90-ch [druhi pa značnaści anhlijski dyvizijon -- NN]. I ŭ asobie isłandca jon znajšoŭ toje, što šukaŭ — sapraŭdnuju reinkarnacyju Vini Džonsa [znakamity anhlijski futbalist, a zatym zorka filmaŭ Haja Ryčy — NN].

11 matčaŭ, 6 žoŭtych kartak i 2 dyskvalifikacyi — voś statystyka Aushiejrsana ŭ «Sarpsbarhu».

Narviehija, ledź nie štohod atrymoŭvaje lišniuju pucioŭku ŭ jeŭrakubkach za košt lidarstva ŭ rejtynhu fejr-płej, była šakavanaja manierami isłandca. Adnak «Sarpsbarh» hanaryŭsia pačatkoŭcam — tafhaju ŭdavalisia navat halavyja pieradačy, a kali jon adbyvaŭ dvuchmatčavuju dyskvalifikacyju, kamanda z chodu prapuściła 9 miačoŭ. Tolki voś hrošaj na vykup futbalista u kłuba nie było. Tamu Aŭshiejr raźvitaŭsia z Narviehijaj, ale abiacaŭ viarnucca — užo ŭ kastryčniku kantrakt isłandca z «Filkiram» skončycca, i jon stanie svabodnym ahientam.

Imidž, viadoma ž, nieadjemny składnik papularnaści Aŭshiejra.

U isłandca samaja aŭtentyčnaja skandynaŭskaja źniešnaść — mahutnaja barada, raskudłačany čub, kidkaja tatuiroŭka i vydatny ciełaskład.

«Kali ja paholeny, mnie na vyhlad hadoŭ trynaccać.

A barada robić mianie strašniejšym - heta važna dla hulcoŭ majho ampłua.

Akramia taho, barada - adzinaje, u čym ja kruciejšy za majho kumira Hatuza, i ja hanarusia hetym».

Aŭshiejra napeŭna ŭziali b na rolu Tora ŭ halivudskich błokbastarach, ale ŭ volny čas isłandziec zaniaty inšym mastactvam -- muzykaj.

Pryčym adnojčy heta zachapleńnie mahło pieravažyć futboł: u 2007 hodzie jaho hrupa Shogun pieramahła ŭ prestyžnym isłandskim rok-batły, atrymała mahčymaść zapisać albom i adpravicca na fest u Ispaniju. Darečy, zapisy Aŭshiejra znachodziacca ŭ volnym dostupie ŭ internecie: pasłuchać mietał možna tut. Praniźliva chrypły vakał naležyć mienavita našamu hieroju.

Na tatuiroŭcy Aŭshiejra adlustravanyja imiony jaho braty i siastry na fonie vialikaha serca, a pobač ź imi - nazva muzyčnaha hurtu Shogun i ni słova pra futboł.

Ale zaraz usio źmianiłasia: «Futboł staŭ dla mianie numaram adzin, tamu mnie pryjšłosia pakinuć hurt.

Toj čas, što ja zajmaŭsia tvorčaściu, byŭ lepšym u maim žyćci. Ale bolš nijakich načnych repietycyj — čas dumać pra karjeru hulca. Ciapier usia muzyka abmiažoŭvajecca Ajpadam - pierad hulniami mianie matyvuje chevi-mietał. Ale ja nie raźvitvajusia z tvorčaściu nazaŭždy. Abiacaju, što pierad adjezdam ź Isłandyi ja arhanizuju kancert, i my pakažam, što takoje rok».

Vobraz dumki, styl žyćcia, maniera hulni - padobna, navat isłandski klimat nie nastolki surovy, nakolki surovy Aŭshiejr Aŭshiejrsan.

Jašče adno chobi tafhaja — kryvavyja bai MMA, a jaho kumiry — Ćjaha «Pitbul» Ałvieš i Hunar «Huni» Nelsan. Darečy, naviny ź śvietu bajoŭ biez praviłaŭ u tvitary Aushiejra źjaŭlajucca chutčej, čym na aficyjnym sajcie MMA.

Jašče adzin hieroj Aŭshiejrsana - amierykanski baskietbalist Alen Ajviersan, jaki viadomy dakładnaściu trochačkovych kidkoŭ i - kudy ž biez hetaha - maskulinnaściu. Ajviersan taksama byŭ spartsmienam, taksama składaŭ muzyku, ale taksama byŭ žudasnym chulihanam. Niejak jon vystaviŭ svaju žonku z chaty hołaj, kali zapadozryŭ jaje ŭ šlubnaj zdradzie, a zatym ź pistaletam la skroni pahražaŭ raspravaj jaje imaviernamu kachanku. Toj fakt, što paśla ciažkich raźbiralnictvaŭ baskietbalistu ŭdałosia viarnucca ŭ sport, Aŭshiejr ličyć aryjenciram čałaviečaj hodnaści.

Isłandziec z tych, kamu dla pieramohi ŭsie srodki dobryja: za siamihadovuju karjeru na jaho rachunku paŭsotni harčyčnikaŭ, 4 vydaleńni i ŭsiaho dva hały.

«Sudździ, napeŭna, užo śmiajucca ź mianie, - uśmichajecca Aŭshiejr, - ale jany pavinny razumieć: maja rola ŭ kamandzie — łamać ataki supiernika. Naša kančatkovaja meta — heta pieramoha, a dla mianie niama bolšaj radaści, čym śviatkavańnie hałoŭ z adnakłubnikami!»

Zaraz isłandziec imkniecca jak maha chutčej zamacavacca siarod profi, bo jaho novy vyklik - heta futbolnaja zbornaja, jakaja jašče nikoli nie była tak blizkaja da traplańnia na čempijanat śvietu. Budźcie ŭpeŭnienyja, hety metanakiravany chłopiec dasiahnie svajoj mety. I kali ŭ jaho žyćci nie zdarycca Rya-de-Žaniejra, to tady abaviazkova hrymnie Vudstak.

• 0
• 0
• 0
• 0
• 0
• 0
• 0
• 0