Pavodle źviestak Ministerstva achovy zdaroŭja, u Biełarusi pa stanie na 1 kastryčnika 2013 h. naličvałasia 175 tysiačaŭ ałkaholikaŭ. Jašče 86 tysiačaŭ čałaviek złoŭžyvajuć ałkaholnymi napojami i znachodziacca na prafiłaktyčnym uliku.
Adnak u statystyku traplajuć tolki dyspansieryzavanyja.
Pradstaŭniki Minzdaroŭja nie nazyvajuć navat prykładnaj ličby chvorych na ałkahalizm u krainie. Ale staršynia siektara narkałohii arhanizacyjna-mietadyčnaha adździeła HU «RNPC psichičnaha zdaroŭja» Uładzimir Maksimčuk paviedamiŭ, što jana značna bolšaja za aficyjnuju statystyku.
Zhodna z apošnimi źviestkami Minzdaroŭja, ahułam nazirajecca pazityŭnaja dynamika: ałkaholikaŭ sioleta stała na 2 tysiačy mienš za minuły hod. Na tysiaču pamienieła niepaŭnaletnich ałkaholikaŭ: ciapier ich 16 tysiačaŭ.
A voś z žanočym ałkahalizmam nazirajecca tryvožaja tendencyja.
Ciaham apošnich 5 hadoŭ kolkaść chvorych žančyn tolki raście i na 1 kastryčnika skłała 39 tysiačaŭ. Na 23% paniziłasia śmiarotnaść ad vypadkovych atručvańniaŭ ałkaholem. Letaś było zafiksavana 1 918 takich atručvańniaŭ.
Usie buduć «dychać u trubačku»
Narkołahi HU «RNPC psichičnaha zdaroŭja» źviazvajuć pośpiechi ź dziaržaŭnaj prahramaj nacyjanalnych dziejańniaŭ pa praduchileńni i pieraadoleńni pjanstva i ałkahalizmu, raspačataj u 2011 h.
Maksimčuk paviedamiŭ, što ŭ ramkach prahramy udzielničajuć 30 ustanoŭ i zapłanavana 60 mierapryjemstvaŭ.
«U hety čas Ministerstva achovy zdaroŭja raspracoŭvaje zakonaprajekt, zhodna ź jakim dopusk supracoŭnikaŭ, zaniatych na niebiaśpiečnaj vytvorčaści, budzie ažyćciaŭlacca praz abaviazkovuju miedkamisiju.
Ciapier abaviazkovuju miedkamisiju pierad pačatkam źmieny prachodziać, naprykład, kiroŭcy hramadskaha transpartu. Adnak my płanujem uvieści taki ž paradak dla tych, chto pracuje sa stankami ci na vyšyni», — pałumačyŭ Maksimčuk.
Ałkaholu boleje
Vytvorčaść ałkaholnych napojaŭ u Biełarusi štohod raście. U 2012 h. u krainie było vyrablena 194 młn litraŭ dystylavanych (h.zn. mocnych) ałkaholnych napojaŭ i 432 młn litraŭ piva. Heta 20,5 litra harełki i 45,6 litra piva na kožnaha žychara. Za 10 hadoŭ vytvorčaść ałkaholnych napojaŭ u Biełarusi pavialičyłasia amal u dva razy.
Mižnarodnaja statystyka taksama nie na karyść Biełarusi — jana stabilna trymaje pazicyju siarod krain z najbolšym spažyvańniem ałkaholu na dušu nasielnictva.
Pavodle spravazdačy Suśvietnaj arhanizacyi achovy zdaroŭja, kožny biełarus starejšy za 15 hadoŭ vypivaje 11,2 litra čystaha etanołu štohod (źviestki za 2005 hod).
U 2012 h. Minzdaroŭja paviedamlała, što na kožnaha biełarusa štohod prychodzicca amal 12 litraŭ etanołu.
Ciapier čytajuć
Zahinuŭ biełaruski dobraachvotnik Vasil «Dzir» Rapicki10
Kamientary