Blizu śniežnia 2014 hoda staŭku refinansavańnia płanujecca źnizić da 13%.
Pra heta paviedamiŭ pieršy vice-premjer Uładzimir Siamaška, adkazvajučy siońnia na pytańni parłamientaryjaŭ u Avalnaj zale Doma ŭrada.
Jon nahadaŭ, što zaraz staŭki pa kredytach znachodziacca na vysokim uzroŭni. «Majo asabistaje mierkavańnie (i premjer-ministr jaho padzialaje) — staŭki pa kredytach, jakija składajuć siońnia 45—50% hadavych, nieabhruntavana zavyšany», — skazaŭ Siamaška.
Navat vysokarentabielnyja pradpryjemstvy nie mohuć absłuhoŭvać kredytnyja resursy pa takim košcie, padkreśliŭ pieršy vice-premjer.
«Samyja paśpiachovyja pradpryjemstvy nie mohuć uziać kredytnyja resursy pad 45—50%, tamu što heta prosta «raspranańnie», strata abarotnych srodkaŭ i viadzie da bankructva»,— skazaŭ Siamaška.
U suviazi z hetym jon zaznačyŭ, što 30 kastryčnika prezidyum Savieta ministraŭ razhladaŭ pytańnie ab vysokich pracentnych staŭkach. Nacbank, pavodle słoŭ Siamaški, płanuje ŭ nastupnym hodzie istotna źnizić staŭku refinansavańnia. «Kiraŭnik Nacbanka Nadzieja Andrejeŭna Jermakova zapeŭniła, što na nastupny hod zakładziena staŭka refinansavańnia (siaredniaja)u biudžet u pamiery 16—17%. U śniežni 2014 hoda płanujecca jaje źnizić da 13%», — paviedamiŭ Siamaška.
Zrešty, dadaŭ pieršy vice-premjer, navat niahledziačy na zapłanavanyja tempy źnižeńnia staŭki refinansavańnia, kredytnyja resursy buduć daražejšyja za toje, što było raniej. «Heta horš, čym było čatyry-piać hadoŭ tamu, ale heta ŭžo niešta, heta ŭžo ruch», — zaŭvažyŭ jon.
Apošnim razam Nacbank źnižaŭ staŭku refinansavańnia ŭ červieni 2013 hoda. Adnak u suviazi z adtokam rublovych układaŭ i pavieličeńniem popytu na valutu rehulatar spyniŭ hety praces, i apošnija čatyry miesiacy staŭka refinansavańnia zachoŭvajecca na niaźmiennym uzroŭni (23,5% hadavych).
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary