Skončyŭsia handal na najbujniejšym kirmašy Eŭropy — Varšaŭskim stadyjonie Dziesiacihodździa, kudy ciaham apošnich amal 20 hadoŭ pa tavary pryjaždžali tysiačy biełarusaŭ.
Skončyŭsia handal na najbujniejšym kirmašy Eŭropy — Varšaŭskim stadyjonie Dziesiacihodździa, kudy ciaham apošnich amal 20 hadoŭ pa tavary pryjaždžali tysiačy biełarusaŭ. U niadzielu na stadyjonie pabyvaŭ karespandent Svabody.
Spadarynia Taciana — z zachodniaj Biełarusi, na stadyjonie handluje kala 5 hadoŭ. Jana prosić svaju susiedku — armianku papilnavać tavar — štučnaje futra, a sama idzie nabyć kruchu kasmetyki:
«Mnie jašče treba pajści tam… zamoviła blask dla vusnaŭ, pamadu…»
Taciana nia choča, kab razmova zapisvałasia, pahadžajecca skazać tolki niekalki słoŭ — jana škaduje, što handlu na stadyjonie ŭžo nia budzie:
«Usie handlavali, jechali, i ŭsim dobra było — i nam, i im.»
Ułady Varšavy i šmat chto z žycharoŭ polskaj staicy, adnak, ličać inačaj — stadyjon, jaki znachodzicca zusim niedaloka ad centru horadu, vyhladaje vielmi brydka z namiotami i śmiećciem, ale pieradusim — u Polščy i va Ŭkrainie praz 5 hadoŭ adbudziecca futbolny čempijanat Eŭropy, i tut budzie pabudavany novy sučasny stadyjon.
«Heta prajekt, ad jakoha šmat čakajuć, i novy nacyjanalny stadyjon pavinien być pabudavany, niahledziačy na toje, što, moža, i nia ŭsio atrymajecca zrabić da čempijanatu Eŭropy», — zajaviła ministar sportu Polščy Elžbieta Jakubiak.
Zamiest stadyjonu handlary atrymajuć mahčymaść ad nastupnaj viasny handlavać u inšym miescy — na vulicy Radzymińskaj, ale heta, jak jany kažuć, užo nia toje.
Raźvitvacca z adnym z symbalaŭ pačatku ekanamičnych pieramienaŭ va ŭschodniaj Eŭropie, miescam, dzie ad siaredziny 50‑ch adbyvalisia najvažniejšyja mierapryjemstvy kamunistyčnych uładaŭ, a potym pačaŭ haspadaryć rynak, dzie handlary razumiejuć movy ŭsich uschodnich susiedziaŭ Polščy, krychu sumna.
Mahčyma tamu ŭ niadzielu, apošni dzień handlu na stadyjonie časta ŭklučali viadomy polski šlaher 30‑ch hadoŭ — tanha «Apošniaja niadziela»…
Ciapier čytajuć
Prakuratura pra śmierć Miełkaziorava: žurnalist mieŭ chraničnuju chvarobu8
Prakuratura pra śmierć Miełkaziorava: žurnalist mieŭ chraničnuju chvarobu
Fiaduta — Kaleśnikavaj: Mašańka, ci viarniciesia na Miesiac, ci nie vučycie žyć tych, chto stamiŭsia nabivać huzy ad čarhovaha nastupańnia na hrabli2828
Kamientary